“Арт-Сядзіба” не змагла адкрыцца ў новым памяшканні

Канцэрт Лявона Вольскага і саксафаніста Паўла Аракеляна, якім мелася адчыняцца “Арт-Сядзіба” перанесены ў памяшкенне Партыі БНФ (вул. Чарнышэўскага, 3), передае “Наша ніва”.

“Мы ўчора рабілі генеральную прыборку. А 18-й гадзіне я вярнуўся на “Сядзібу”і ўбачыў, што дзверы апячатаныя, а побач вісіць паперка з прозвішчамі двух сведкаў. Выявілася, што, пакуль нас не было, МНС нас зачыніла”,- распавёў у размове з выданнем арт-дырэктар “Арт-Сядзібы” Павал Белавус.

“Уласнік памяшкання пасля расказаў, што як толькі ў інтэрнэце з’явілася інфармацыя пра нашае адкрыццё, яго выклікалі ў міністэрства, літаральна паднялі з ложка. Склалі паперу. Мы, канечне, можам адкрыцца, але спачатку да нас прыедзе МНС, пасля санстанцыя, пасля яшчэ хто-небудзь. Болей за пару месяцаў мы ўсё адно не пратрымаліся б, таму скасавалі дамову”,- сказаў прадстаўнік “Арт-Сядзібы”.

“Рэч у тым, што Фрунзенскі раён вельмі кансерватыўны. Нам уласнік сёння сказаў, што лепей шукаць памяшканне ў іншым раёне: адміністрацыя Фрунзенскага вельмі ўсяго баіцца. Вось яны нас убачылі, пачулі пра Вольскага”,- заўважыў Павал Белавус.

Тым не меньш, спробы аднавіць “Арт-Сядзібу” не будуць спыненыя. “У нас зараз ёсць для таго сродкі, магчымасці, людзі. Відаць, будзем шукаць памяшканне, якое належыць фізічна асобе, каб гэты чалавек не баяўся пусціць нас да сябе. Ці будзем шукаць памяшканне, якое належыць замежнікам, ці паспрабуем дамаўляцца з амбасадамі”,- сказаў Павал Белавус.