Гістарычная серада ў кнігарні "логвінаЎ": сустрэча з дзясяткамі новых публікацый аб нашай мінуўшчыне

Для ўдзелу ў сустрэчы з Варшавы спецыяльна прыедзе гісторык Ян Шумскі, аўтар контраверсійнай манаграфіі “Саветызацыя Заходняй Беларусі (1944-1953). Прапаганда і адукацыя на службе ідэалогіі”, якая нядаўна выйшла ў перакладзе на беларускую мову. Кніга расказвае пра беларускі, польскі і ўкраінскі супраціў у Заходняй Беларусі ў 1944-1953 годы, а таксама раскрывае механізмы русіфікацыі і саветызацыі яе карэннага насельніцтва.

Гісторык Андрэй Мацук прадставіць свежы нумар часопіс “ARCHE”: “Вайсковая гісторыя Вялікага Княства Літоўскага”, які ўзняў буру зацікаўлення сярод беларускага чытача.

Гісторык Алесь Пашкевіч прадставіць пашыранае і дапоўненае перавыданне даследавання Алега Латышонка “Нацыянальнасць - беларус”.

Рэдактар “ARCHE” Валер Булгакаў прэзентуе пераклад на беларускую мову даследавання прафесара Гарвардскага ўніверсітэта Сяргея Плахія “Рускі Вавілон. Дамадэрныя ідэнтычнасці ў Расіі, Украіне і Беларусі”. Ён таксама раскажа пра багата ілюстраваную кнігу “Палітычная гісторыя незалежнай Беларусі (да 2006)” (1228 старонак), якая нядаўна пабачыла свет.

Будзе прадстаўлены папулярны сёлетні нумар “ARCHE”: “Гісторыя беларускай штодзённасці”.

Апрача гэтага, размова зойдзе пра кнігі:

• Міраслаў Янковяк. Беларускія гаворкі ў Краслаўскім раёне Латвіі.
• Дарыюш Купіш. Полацак 1579.
• Уладзімір Ляхоўскі. Ад гоманаўцаў да гайсакоў. Чыннасць беларускіх маладзёвых арганізацый у другой палове ХІХ - першай трэці ХХ ст.
• Станіслаў Ліс-Блонскі. Балахоўцы.
• Эдмундас Гімжаўскас. Беларускі фактар у аднаўленні літоўскай дзяржавы (1915-1923).
• Рэвізія Полацкага ваяводства 1552 года (з вялікай мапай Полацкага ваяводства сярэдзіны ХVI стагоддзя).
• Кніга Полацкага Магістрату 1727.

Увага: зніжкі на гэтыя і іншыя выданні “ARCHE” падчас прэзентацыі будуць сягаць 50%.

На вечарыне са зніжкамі можна будзе набыць “Віцебскі краёвы слоўнік” Міколы Каспяровіча, “Краёвы слоўнік Чэрвеншчыны” Міколы Шатэрніка, “Расійска-беларускі слоўнік” Сцяпана Некрашэвіча і Міколы Байкова, а таксама дзясяткі іншых публікацый выдавецтва “ARCHE”.

Запрашаюцца ўсе зацікаўленыя беларускай гісторыяй.

Крыніца