Падаткавікі патрабуюць ліквідаваць установу "Платформа"

У Гаспадарчым судзе Мінску сёння адбудзецца папярэдняе судовае паседжанне па пытанні ліквідацыі інфармацыйна-асветніцкай установы "Платформа". Адпаведны пазоў у суд накіравала інспекцыя па падатках і зборах Савецкага раёну Мінска.

У ліпені і жніўні гэтага году падаткавікі двойчы прыцягвалі ўстанову "Платформа" да адміністратыўнай адказнасці, спачатку нібыта за несваечасовую падачу справаздачы па падатку на прыбытак, а пасля за непаведамленне падатковаму органу пра змену месцазнаходжання арганізацыі, паведамляе сайт "Платформы".

Пры гэтым праваабаронцы адзначаюць, што ўсе справаздачы па падатказ былі прадстаўленыя ў інспекцыю яшчэ ў сакавіку, і толькі ў ліпені прадстаўнікі падатковай інспекцыі "заўважылі" недахоп адной справаздачы. Месцазнаходжанне арганізацыя не змяняла, адзначаюць у "Платформе".

За адміністратыўныя правапарушэнні вынесенае пакаранне ў выглядзе штрафаў на агульную суму ў 4 мільёны рублёў.