Літва і Беларусь спрачаюцца наконт прычыны зніжэння ўзроўню вады ў Нёмане

У Міністэрства замежных спраў Літвы прыйшоў афіцыйны адказ Міністэрства прыродных рэсурсаў і аховы навакольнага асяроддзя Беларусі на ноту з нагоды зніжэння ўзроўню вады ў рацэ Нёман да крытычнага, дасланую 2 жніўня.

Беларускі бок тлумачыць зніжэнне ўзроўню вады ў Нёмане прыроднай сітуацыяй: у гэты летні сезон ападкаў зафіксавана ніжэй за сярэднюю норму, акрамя таго, з мінулай восені і зімы скараціўся ўзровень грунтовых вод, перадае БелаПАН са спасылкай на прэс-службу літоўскага МЗС.

Гідраметэаралагічная служба Літвы бліжэйшым часам апублікуе свой каментар адносна дадзенай праблемы, адзначаецца ў паведамленні.

Як паведамляе прэс-служба МЗС Літвы, паводле ацэнкі экспертаў з гэтай краіны, гэта з'ява "не была звязана з натуральнымі працэсамі, а магла быць выклікана чалавечай дзейнасцю". Эксперты лічаць, што небяспечнае падзенне ўзроўню вады магло быць зафіксавана пасля запаўнення вадасховішча Гродзенскай ГЭС.

16 жніўня намеснік дырэктара дэпартамента па гідраметэаралогіі Міністэрства прыродных рэсурсаў і аховы навакольнага асяроддзя Ігар Рагозін паведаміў, што беларускія эксперты не звязваюць падзенне ўзроўню вады ў Нёмане з запаўненнем вадасховішча Гродзенскай ГЭС. На іх думку, прычына палягае ў тым, што ўвосень 2011 года ў Беларусі выпала анамальна малая колькасць ападкаў, і іх недахоп не быў папоўнены нават падчас вясенняй паводкі.

"Для такой ракі ваганні вады на 30—40 см у апошнія гады назіраліся досыць часта, асабліва з улікам летняй спякоты і засухі", — заявіў тады Рагозін.

Прадстаўнік Мінпрыроды Беларусі падкрэсліў, што ў Беларусі, у адрозненне ад Літвы, няма норм па ўзроўні вады ў Нёмане, больш за тое, літоўскі бок не ўзгадняў такія нормы з Беларуссю.