У міністэрстве адукацыі задумаліся пра павелічэнне колькасці ўрокаў у школе

Падчас педагагічнай канферэнцыі «Прафесіяналізм і грамадзянскасць — аснова стабільнасці і ўстойлівага развіцця сталіцы» міністар адукацыі Беларусі Сяргей Маскевіч заявіў пра магчымае павелічэнне колькасці ўрокаў у агульнаадукацыйных установах або навучальнага года.

«Вынікі правядзення цэнтралізаванага тэставання паказваюць, што нашым вучням адназначна не хапае яшчэ аднаго урока ў тыдзень па такіх прадметах, як, напрыклад, фізіка. На жаль, у гэтым аспекце мы прайграем Расіі, а значыць, гэтую сітуацыю неабходна тэрмінова выпраўляць», — перадае БелТА словы Сяргея Маскевіча.

Таксама міністэрства разглядае варыянт павелічэння навучальнага года, каб за кошт новых гадзін дапоўніць адукацыйны працэс ўрокамі фізікі, матэматыкі, іншых прадметаў.