Супраць журналіста з Воршы завялі крымінальную справу

Аршанскі гарадскі аддзел Следчага камітэта Рэспублікі Беларусь завёў крымінальную справу супраць журналіста Мікалая Петрушэнкі за “знявагу прадстаўніка ўлады”, паведамляе сайт Беларускай асацыяцыі журналістаў.

Нагодай для ўзбуджэння крымінальнай справы стаў артыкул Мікалая Петрушэнкі “Педафіл атрымліваў прэміі за лепшыя дзіцячыя пляцоўкі”, размешчаны 8 жніўня на сайце nash-dom.info.

Паводле пастановы за подпісам старшага следчага С. Шчарбянка, аўтар артыкулу “ўказвае”, што намеснік старшыні аршанскага гарвыканкама падазраецца ў спрыянні дзейнасці педафіла. Тым самым Петрушэнка “публічная зняважыў” гарадскога чыноўніка “як прадстаўніка ўлады ў сувязі з выкананнем ім службовых абавязкаў”, - гаворцца ў пастанове.

Сабраныя матэрыялы ўтрымліваюць дастатковыя дадзеныя, што ўказваюць на прыкметы злачынства паводле арт. 369, - лічыць следчы. У звязку з гэтым ён пастанаўляе ўзбудзіць справу ў дачыненні да Петрушэнкі і прыняць яе да вытворчасці.

Намеснік старшыні ГА “БАЖ”, юрыст Андрэй Бастунец лічыць, што ў Следчым камітэце няправільна кваліфікавалі дзеянні жуурналіста. "Нармальнай тут была б грамадзянска-прававая працэдура разгляду справы. Сам гэты факт пацвярджае высновы БАЖ, што наяўнасць крымінальных артыкулаў за дыфамацыю службовых асобаў нясе ў сабе пагрозу для журналістаў. Тым больш што моц дзяржаўнага механізму выкарыстоўваецца часта ў абарону службовых асобаў, якія з’яўляюцца часткай гэтага механізму”,- падкрэсліў Андрэй Бастунец.