Дзень памяці ахвяраў таталітарызму адзначаецца 23 жніўня

Агульнаеўрапейскі Дзень памяці ахвяраў таталітарных і аўтарытарных рэжымаў адзначаецца 23 жніўня. Рашэнне пра гэтае свята было прынята рэзалюцыяй Парламенцкай асамблеяй АБСЕ ад 3 ліпеня 2009 году.

«Нагадваючы, што веданне гісторыі дапамагае пазбегнуць паўтарэння гэткіх злачынстваў у будучыні, і што шчырае і грунтоўнае абмеркаванне гісторыі будзе спрыяць прымірэнню на падставе ісціны і ўшанавання памяці загіблых ПА АБСЕ зноў пацвярджае сваю адзіную пазіцыю, якая адкідае таталітарнае кіраванне ў якой бы то ні было форме незалежна ад яго ідэалагічнай базы» – нагадвае Радыё "Свабода" тэкст рэзалюцыі пад назвай «Аб аб’яднанні падзеленай Эўропы».

Рэзалюцыя, якая не мела абавязковай сілы і ўяўляла сабою палітычную заяву, асудзіла абодва таталітарныя рэжымы ХХ стагоддзя – нацызм і сталінізм.

Дата 23 жніўня была выбрана ў сувязі з падпісаннем пакту Молатава-Рыбэнтропа ў Маскве 23 жніўня 1939 году. Пакт Молатава-Рыбэнтропа аб ненападзе ўключаў сакрэтны пратакол, у якім СССР і Нямеччына дзялілі Ўсходнюю Еўропу на сферы свайго ўплыву.