Васіль Парфянкоў зноў за кратамі

Личности

Фігуранта “справы 19 снежня” Васіля Парфянкова, які правёў у зняволенні восем месяцаў, 9 жніўня зноў арыштавалі.

А 7:50 ён патэлефанаваў сваёй знаёмай Вользе і паведаміў, што па яго прыйшла міліцыя, каб этапаваць у арыштны дом. Васіль таксама выказаў меркаванне, што сёння цягам дня ён будзе чакаць этапу ў РУУС Першамайскага раёна Мінска. Пазней у яго адабралі мабільны тэлефон, перадае “Радыё Свабода”.

Як раней паведамляла Служба інфармацыі “ЕўраБеларусі”, Васіль Парфянкоў быў затрыманы 4 студзеня 2011 года і абвінавачаны ва ўдзеле ў масавых беспарадках пасля прэзідэнцкіх выбараў 19 снежня. 17 лютага суддзя Фрунзенскага суда Мінска Вольга Комар асудзіла маладога чалавека на 4 гады зняволення ў калоніі суворага рэжыму. Таксама ён мусіў кампенсаваць страты — 14,7 млн рублёў за нібыта пашкоджаны падчас мітынга будынак.

Вязень адбываў пакаранне ў Аршанскай калоніі №8, яго вызвалілі 13 жніўня 2011 года ў адпаведнасці з указам прэзідэнта аб памілаванні. Па вызваленні Васіль удзельнічаў у грамадска-палітычным жыцці, праз гэта 5 студзеня 2012 года за ім устанавілі прэвэнтыўны нагляд тэрмінам на адзін год.

Cуд Першамайскага раёна Мінску 29 траўня прызнаў былога палітвязня вінаватым ў парушэнні ўмоваў прэвэнтыўнага нагляду, суддзя Сяргей Бандарэнка пакараў яго арыштам на шэсць месяцаў.

Касацыйную скаргу Васіля Парфянкова Мінскі гарадскі суд разглядаў 24 ліпеня і вырашыў яе не задаволіць.