Міхаіл Пастухоў: КДБ не мае права хаваць інфармацыю пра Антона Сурапіна

Личности

Следчыя органы незаконна забараняюць адвакату журналіста Антона Сурапіна паведамляць інфармацыю пра прававы статус маладога чалавека. Пра гэта заявіў былы суддзя Канстытуцыйнага суда Беларусі Міхаіл Пастухоў.

Артыкул 48 Крымінальна-працэсуальнага кодэкса дае права адвакату ведаць, у якім статусе знаходзіцца яго падабаронны, нагадаў юпыст. Адвакат таксама мае права прысутнічаць на ўсіх допытах і ведаць пра высоўванне падабароннаму афіцыйнага абвінавачання.

“Артыкул, на падставе якога абвінавачваюць таго ці іншага чалавека, не можа з’яўляцца таямніцай следства. Следчыя органы маюць права засакрэціць непасрэдна матэрыялы крымінальнай справы, але не факт прад’яўлення самога абвінавачання,” - цытуе Міхаіла Пастухова прэс-служба Беларускай асацыяцыі журналістаў.

Паводле яго, следчыя органы могуць дзейнічаць выключна ў межах працэсуальнага закона. Усё астатняе, на думку юрыста, - гэта пазбаўленне грамадства законнай інфармацыі.

Як раней паведамляла Служба інфармацыі “ЕўраБеларусі”, 4 ліпеня швэдскі самалёт зкінуў на тэрыторыю Беларусі некалькі соцень цацачных мядзведзяў з лозунгамі ў падтрымку свабоды слова. У прастору краіны самалёт патрапіў без дазволу беларускіх уладаў.

Па гэтай справе арыштавалі журналіста Антона Сурапіна, які першым выклаў у Інтэрнэт фатаздымкі швэдскіх цацак, а таксама Сяргея Башарымава, у якога дамовіліся зняць кватэру швэды. Апошеняму ўжо выставілі абвінавачванне па ч. 3 арт. 371 КК “Незаконнае перасячэнне Дзяржаўнай мяжы Рэспублікі Беларусь”.

Беларуская асацыяцыя журналістаў 25 ліпеня афіцыйна звярнулася да старшыні КДБ Беларусі з патрабаваннем неадкладна вызваліць свайго чальца Антона Сурапіна і спыніць яго крымінальны пераслед. Адказу на гэты зварот БАЖ да гэтага часу не атрымала.