Беларусы стартавалі лепш за астатніх еўрапейцаў

Зборная Беларусі па футболе апынулася адзінай з еўрапейскіх каманд, якая здолела атрымаць перамогу ў стартавым туры алімпійскага футбольнага турніру.

У сваім першым паядынку на Гульнях у Вялікабрытаніі беларусы з мінімальным лікам 1:0 адолелі зборную Новай Зеландыі. Адзіны гол на рахунку гульца барысаўскага БАТЭ Дзмітрыя Багі. У паралельным матчы групы «С» бразільцы перамаглі егіпцян з лікам 3:2.

Гаспадары турніру, зборная Вялікабрытаніі не здолела перайграць зборную Сенегала - 1:1. З такім жа лікам завяршыўся паядынак паміж камандамі Габона і Швейцарыі. А вось іспанцы дастаткова нечакана на старце турніру саступілі японцам з лікам 0:1. Такім чынам, Беларусь аказалася адзінай еўрапейскай камандай, якая здолела ў першым матчы заваяваць тры пераможных ачкі.

Адзначым, што напярэдадні Алімпіяды брытанскія ўлады адмовілі ў акрэдытацыі прэзідэнту Беларусі Аляксандру Лукашэнку. У пятніцу адбудзецца ўрачыстае адкрыццё летніх Алімпійскіх гульняў у Лондане, а футбольная зборная Беларусі свой наступны матч на алімпійскім турніры правядзе супраць зборнай Бразіліі 29-га ліпеня.