На ўездзе ў Беларусь затрымалі журналіста “Еўрарадыё” (абноўлена)

Раніцай 24 ліпеня супрацоўнік “Еўрарадыё” Віталь Ругайн ехаў цягніком з Вільні ў Мінск. Пасля мытнага дагляду ў хлопца забралі пашпарт.

Спачатку сувязі з Віталём не было, пазней ён патэлефанаваў у рэдакцыю і паведаміў, што прайшоў поўны мытны дагляд. Яго ўжо збіраліся вызваліць, але раптам вярнулі: "Пачакайце, з вамі хочуць пагутарыць". У Ругайна забралі пашпарт, паведамляе “Еўрарадыё”.

У журналіста канфіскавалі ноўтбук і склалі пратакол канфіскацыі. Праз некаторы час ноўтбук аддалі, сказалі, што не маюць да Віталя прэтэнзій, і адпусцілі. У агульнай колькасці журналіст правёў на мяжы тры гадзіны. Ён не здолеў трапіць на цягнік і накірозваецца ў Мінск аўтаспынам, піша TUT.BY.

Як раней паведамляла Служба інфармацыі “ЕўраБеларусі”, 22 чэрвеня быў затрыманы журналіст “Еўрарадыё” Павал Свярдлоў. Яго абвінавацілі ў лаянцы і прысудзілі да арышта на 15 сутак.

Пасля затрымання Свярдлова невядомыя ў цывільным чакалі каля офіса Віталя Ругайна, яны паказвалі карэспандэнта журналіста вахцёрцы. Аднак з дапамогай журналістаў іншых СМІ, якія прыйшлі ў офіс “Еўрарадыё”, Ругайну ўдалося застацца на волі і з'ехаць у Польшчу. Сёння ён упершыню пасля вяртання з адпачынку спрабаваў прыехаць у Беларусь.

“Еўрарадыё” звязвае ўвагу ўладаў да сваіх супрацоўнікаў з рэпартажам пра сталічнае метро, куды журналісты змаглі прайсці з вялікай торбай. Па словах рэдактара СМІ Віталя Зыблюка, затрыманні – гэта сваеасаблівая “помста”.