Беларускія ВНУ возьмуць удзел у Erasmus Mundus

Выканаўчая агенцыя па адукацыі, культуры і аўдыёвізуальных сродках, якой Еўрапейская Камісія даручыла кіраванне праграмай Erasmus Mundus, абвясціла вынікі сёлетняга адбору прапаноў па праектах у рамках ўсіх трох кампанентаў праграмы.

Універсітэты краін ЕС і краін па-за яго межамі могуць прадстаўляць свае прапановы па праектах, што прадугледжваюць стварэнне ў рамках Erasmus Mundus магістарскіх праграм і супольных дактарантур (Кампанент 1), судзейнічанне мабільнасці студэнтаў і выкладчыкаў (Кампанент 2) і судзенічанне развіццю Еўрапейскай вышэйшай адукацыі (Кампанент 3).

Беларускія ВНУ актыўна ўдзельнічаюць у Кампаненце 2 праграмы.

Пачынаючы з 2012—2013 гг., адзінаццаць універсітэтаў стануць удзельнікамі сямі партнэрстваў з універсітэтамі іншых краін-членаў ЕС і краін, што не ўваходзяць у ЕС. Кожнае партнэрства складаецца з не менш як пяці вышэйшых навучальных устаноў па меншай меры трох краін ЕС, таксама навучальных устаноў краін шэрагу рэгіёнаў, якія не ўваходзяць у ЕС. Стыпендыі рознай працягласці для студэнтаў, навукоўцаў, даследчыкаў, і спецыялістаў з краін ЕС і краін, якія не ўваходзяць у ЕС, — частка гэтых партнэрскіх пагадненняў.

Для Беларусі ў рамках гэтых сямі партнэрстваў на бліжэйшыя тры-чатыры гады прадуглежана каля 200 стыпендый, піша “Наша Ніва” з спасылкай на Delegation Belarus Press.