За галадоўку хворым на сухоты пагражаюць псіхіятрычным шпіталем

Чацвёрты дзень галадуе пацыент сухотнага шпіталя ў Багушэўску (Віцебская вобласць) Мікалай Такаровіч, які выказвае нязгоду з метадамі лекавання.

Пра гэта распавяла каардынатарка аргкамітэта па стварэньні партыі “Беларуская хрысціянская дэмакратыя” Тацяна Севярынец.

"Мне паведаміў праз тэлефон наш прыхільнік Валер Ганчарэнка. Ён таксама пацыент багушэўскага шпіталя, хранічна хворы на сухоты. Як і большасьць тамтэйшых пацыентаў, ён мусіць праводзіць у шпіталі шмат часу, і такія хворыя трапляюць у вялікую залежнасьць ад адміністрацыі, асабліва калі ў іх няма родных, каб за іх заступіліся. Спадар Ганчарэнка кажа, што ўчора яго выклікала галоўлекар Наталля Лясная, заявіўшы, што гэта ён падбухторшчык галадоўкі пратэсту. І прыгразіла, што абодвух перавядзе ў мясцовае псіхіятрычнае аддзяленне, калі яны не перастануць перадаваць звесткі з шпіталя ў незалежныя СМІ”, - цытуе яе “Радыё Свабода”.

Як раней паведамляла Служба інфармацыі “ЕўраБеларусі”, Мікалай Такаровіч распачаў галадоўку, паколькі ў шпіталі ўзмацніўся ціск на хворых, якія выказваюць сваю нязгоду з метадамі лекавання.

Так, мэтады лекаваньня і прэпараты яны лічаць састарэлымі, а харчаваньне ўвогуле параўноўваюць з турэмным. Апрача таго, як бачна на фотаздымку, сам будынак шпіталя патрабуе рэмонта,

Напрыканцы мінулага году тое сама незалежным журналістам казаў і Валер Ганчарэнка, які тады таксама абвесціў галадоўку пратэсту. Пасля гэтага яго насамрэч перавялі ў псіхіятрычнае аддзяленне, дзе трымалі некалькі месяцаў. Афіцыйнай прычынай пераводу было названа псіхічнае захворванне. У іншых пацыентаў у той самы час пазабіралі мабільныя тэлефоны, пазбавіўшы мажлівасці выходзіць у інтэрнэт, і нават алоўкі ды паперу.