Супраць Змітра Дашкевіча распачатая новая крымінальная справа

Личности

Раніцай 18 ліпеня у перадачы “Зона Х” па беларускім тэлебачанні абвесцілі, што “прынята рашэнне” ўзбудзіць у дачыненні да Зміцера Дашкевіча яшчэ адну крымінальную справу.

Артыкул, які інкрымінуюць палітвязню, - “злоснае непадпарадкаванне патрабаванням адміністрацыі калоніі”.

Як раней паведамляла Служба інфармацыі “ЕўраБеларусі”, калі Зміцера Дашкевіча прызнаюць вінаватым па гэтым артыкуле, яму могуць дадаць да турэмнага тэрміну яшчэ год зняволення. Нагадаем, апазіцыянер напярэдадні апошніх прэзідэнцкіх выбараў быў асуджаны на 2 гады пазбаўлення волі па абвінавачванні ў хуліганстве. Ён павінен выйсці на свабоду 18 снежня 2012.

“Прымяненне артыкула 411 КК Рэспублікі Беларусь - вельмі распаўсюджаная з'ява ў беларускіх турмах, - пісаў на сваім сайце былы палітзняволены Валер Леванеўскі. - Часта прымяняецца незаслужана, і да тых асуджаных, хто мае пачуццё ўласнай годнасці, хто патрабуе ад адміністрацыі калоніі захавання законаў, правоў асуджаных. Замест выхаваўчай працы з асуджаным, адміністрацыя калоній часта, такім чынам, трымае ў страху іншых асуджаных. Асуджаны ставіцца перад выбарам - выконваць злачынныя дзеянні па загадзе прадстаўнікоў адміністрацыі (збіваць іншых асуджаных і т.п.) або быць сумленным “арыштантам”.

“Тых, хто гэтаму пярэчыць, могуць “зрабіць” злосным парушальнікам рэжыму ўтрымання па сфабрыкаваным ці неабгрунтаваным абвінавачванням, змясціць у СІЗА, ПКТ і потым закрытым выязным судом асудзіць па 411 арт. КК Рэспублікі Беларусь. Зыходзячы з судовай практыкі, усе, каго адміністрацыя калоніі “прадставіла” да дадатковага тэрміну па арт.411 КК Рэспублікі Беларусь, атрымліваюць тэрміны без належнага судовага разбору”, - дадаў ён.