На Віцебшчыне пацыенты лякарні абвесцілі галадоўку

У Багушэўскім абласным сухотным шпіталі ў Віцебскай вобласці зноў узмацніўся ціск на хворых, якія выказваюць сваю нязгоду з метадамі лекавання.

"Пры гэтым носьбіты бактэрыялагічнай зброі, якія сутыкаюцца з надзвычайным прэсінгам, могуць абараняцца толькі пасродкам палачкі Коха і галадоўкі, якія для хворых на сухоты супрацьпаказаная, бо іх лекаванне напрамую залежыць ад належнага харчавання", - цытуе пацыентаў прэс-служба “Беларускай хрысціянскай дэмакратыі”.

Па словах хворых, згодна з статыстыкай, харчаванне ажыццячўлецца ў адпаведнасці з нормамі міністэрства аховы здароўя, але насамрэч не адрозніваюцца ад пайкі для асуджаных у турмах.

Таксама хворыя выступаюць супраць "новых" метадаў лекавання, якія ўжывае адміністрацыя шпіталю і якія з'яўляюцца састарэлымі ў сусветнай практыцы, а ў краінах Еўрапейскага звязу не выкарыстоўваюцца ўжо 40 гадоў.

"Метады лекавання патрабуюць найхутчэйшага рэфармавання па ўсёй тэрыторыі таталітарнай дзяржавы. З мэтай хавання фактаў незадаволенасці пацыентаў адміністрацыя працягвае ціснуць на хворых. Я вымушаны абвесціць з 17 ліпеня галадоўку з адмовай ад прыёму ўсіх лекаў", - заявіў інвалід другой групы Мікалай Такаровіч.

Як раней паведамляла Служба інфармацыі “ЕўраБеларусі”, у траўні з’явілася непацверджаная інфармацыя пра тое, што пацыентаў аднога з псіхіятрычных шпіталяў Беларусі катуюць адсутнасцю сна.