GUDA адкрывае Школу традыцыйнага мастацтва

У Мінску адкрываецца Школа традыцыйнага мастацтва фальклорнага гурта GUDA, у якой можна навучыцца беларускім традыцыйным спевам, танцам і рамёствам, стварыць уласны народны строй.

“Беларусь — краіна з надзвычай багатай традыцыйнай культурнай спадчынай. Старадаўнія песні і танцы, якія так любілі і шанавалі нашы дзяды і прадзеды, сёння незаслужана забытыя і страчаныя для бальшыні насельніцтва Беларусі. А між тым усе мы маем права карыстацца гэтай спадчынай у штодзённым жыцці і ў часе святаў”, - кажа спявачка гурта Вікторыя Міхно.

Як у сваёй сям’і адсвяткаваць Каляды, якія стравы можна прыгатаваць? Як можна бавіць час з сябрамі з танцамі і гульнямі? Для чаго робяць пудзіла на Масленіцу? Чаму кашулі аздаблялі такім прыгожым геаметрычным арнаментам і якую інфармацыю ён нясе? Як сваімі рукамі сплесці пас?

Знайсці адказы на гэтыя пытанні не толькі цікава, але і карысна з практычнага пункту гледжання: бо хто з нас не марыў на свята здзівіць гасцей новымі стравамі ды забавамі, надзець адзенне, зробленае сваімі рукамі, рукамі блізкіх людзей?

Заняткі ў Школе традыцыйнага мастацтва прызначаныя для дзяцей і дарослых і праводзяцца ў групах:

— дзіцячай (6–10 гадоў);

— падлеткавай (11–15 гадоў);

— студэнцкай (16–21 год);

— дарослай (старэйшыя за 21 год).

Навучанне ў Школе ідзе на наступных кірунках:

— традыцыйнае спеўнае мастацтва;

— традыцыйны беларускі танец;

— рамёствы, стварэнне ўласнага беларускага строю.

У летні перыяд заняткі па спевах праводзяцца ня толькі ў памяшканьні, але і на вольным паветры.Кожны курс суправаджаецца ўводзінамі ў філасофію і эстэтыку традыцыйнага мастацтва.

Для дзяцей у праграму ўваходзіць знаёмства са старажытнымі легендамі, казкамі, гульнямі, святкаваньне Калядаў, Гуканне вясны, іншыя сьвяты традыцыйнага календара, танцавальныя ранішнікі.

Навучанне платнае, на беларускай мове, праводзіцца ў Мінску, Полацку, Наваполацку.

Фальклорны гурт GUDА мае 20гадовую гісторыю і адметны глыбокай тэарэтычнай падрыхтоўкай спявачак у галіне этнаграфіі, фальклору, культуралогіі, сацыяльнай і культурнай антрапалогіі.

Дадатковую інфармацыю пра Школу традыцыйнага мастацтва можна знайсці тут.