Зміцер Дашкевіч чакае новай крымінальнай справы

Личности

Палітычна асуджаны Зміцер Дашкевіч 10 ліпеня напісаў начальніку калоніі дакумант, паколькі прадчувае магчымае завядзенне супраць сябе новай крымінальнай справы.

Адміністрацыя папраўчай калоніі №13, дзе адбывае пакараньне лідэр “Маладога Фронта”, 6 ліпеня падала матэрыялы на ўзбуджэньне крымінальнай справы за “невыкананне рэжыму калоніі” (ч.1 арт.411 Крымінальнага кодэкса) у следчы камітэт. Пра гэта гэта даведалася Наста Палажанка, нарачоная Змітра, якая 10 ліпеня наведала калонію.

Як стала вядома, Зміцер Дашкевіч амаль адразу пасля выхаду ў атрад быў змешчаны ў штрафны ізалятар тэрмінам на 13 дзён. Пазней Дашкевіч даведаўся, што яму дадалі некалькі сутак зняволення ў ізалятары нібыта за правапарушэнні, якія былі здзейсненыя раней. У адказ на магчымае завядзенне новай крымінальнай справы палітвязень напісаў наступны дакумант:

“Начальніку ПК-13

Яўка з павіннаю

Я, Дашкевіч Д.В., прызнаю сябе віноўным у тым, што свядома адмаўляюся выконваць некаторыя патрабаваньні адміністрацыі калёніі, якія лічу незаконнымі.

Каб спрасьціць працу правакатарам, агентам і сьледчаму камітэту, я адмаўляюся выконваць любыя патрабаваньні адміністрацыі любой калёніі ў якой я буду знаходзіцца.

Раю беларускім спэцслужбам асудзіць мяне на максімальны тэрмін, прадугледжаны арт. 411 КК РБ, пры гэтым рыхтуючы на мяне новыя крымінальныя справы ў кожнай новай калёніі.

Зьміцер Дашкевіч

10.07.2012”.

Калі вязня прызнаюць вінаватым па арт. 411, яму могуць дадаць да тэрміну зняволення яшчэ год, паведамляе сайт “Маладога Фронта”. Нагадаем, Зміцер Дашкевіч быў арыштаваны напярэдадні падзеяў Плошчы-2010, яго асудзілі на 2 гады пазбаўлення волі па абвіначачванні ў бойцы. Малады чалавек мусіць выйсьці на свабоду 18 снежня 2012.