Страйк у Бабруйску: працоўным скарацілі заробак на 45%

На Бабруйскім заводзе трактарных дэталяў і агрэгатаў пратэстуюць дзьве брыгады другой змены цэху зборкі трактароў.

Як паведаміў супрацоўнік прадпрыемства, які пажадаў застацца неназваным, нагодай для пратэсту сталася змяншэньне заробку. Адмаўляюцца працаваць каля дваццаці чалавек.

"Мы сёння прыйшлі на змену, нам далі разліковыя квіткі. І нас пазбавілі даплат на 45%. Ніякіх азнаямленняў ані з ніякімі загадамі не было. Проста ўзялі і пазбавілі. Начальства нічога не хоча тлумачыць. Мы адмовіліся сёння працаваць. Самі мы на змене, нікуды не сыходзім, але і не працуем. Запалохвалі нас. Казалі, што пазвальняюць. Пагражалі, што за гэты месяц нас пазбавяць даплат на 100%. Сказалі, што знойдуць, за што. Змена наша сканчаецца а 24-й гадзіне. Заўтра пойдзем да завадзкога начальства”, - цытуе працаўніка завода “Радыё Свабода”.

Бабруйскі завод трактарных дэталяў і агрэгатаў вырабляе намеклятурныя вузлы для ўсёй лінейкі трактароў Мінскага трактарнага заводу. Прадпрыемства – адно з самых паспяховых у Бабруйску. На ім працуе больш за тры з паловай тысячы чалавек.