Еўракамісію непакоіць бяспраўе беларусаў

Личности

Пра гэта 5 ліпеня падчас выступлення на пленарнай сесіі Еўрапарламента ў Страсбурзе заявіла еўракамісар Коні Хедэгард.

“Тым часам як Беларусь рыхтуецца да вераснёвых парламенцкіх выбараў, пераважае ўсеагульны клімат страху, пры якім не дапушчаюцца незалежнае палітычнае меркаванне і дэманстрацыі, а незалежным журналістам сістэматычна ствараюць перашкоды ў выкананні імі прафесійных абавязкаў”, - цытуе яе БелаПАН.

Коні Хедэгард нагадала, што кіраўнік дыпламатыі ЕС Кэтрын Эштан ізноў заклікае беларускія ўлады “спыніць усе акты запалохвання прадстаўнікоў незалежных СМІ, грамадства і палітычнай апазіцыі, а таксама адмовіцца ад рэпрэсіўнай палітыкі”.

Еўракамісар падкрэсліла, што Еўрасаюз вітае прыняцце Радай ААН па правах чалавека рэзалюцыі па Беларусі, ініцыяванай ЕС, якая заклікае ўлады краіны неадкладна выпусціць на волю ўсіх палітвязняў. “Гэта вялікі поспех Еўрапейскага саюза. Рэзалюцыя заклікае неадкладна і без умоў вызваліць і рэабілітаваць усіх палітычных зняволеных, а таксама засноўвае мандат спецыяльнага дакладчыка па Беларусі, які будзе штогод прадстаўляць даклад (па сітуацыі з правамі чалавека) СПЧ і Генеральнай асамблеі ААН”, - адзначыла яна.

Як раней паведамляла Служба інфармацыі “ЕўраБеларусі”, у прынятай 5 ліпеня рэзалюцыі Еўрапарламент заклікае дзяржавы-удзельніцы ЕС ацаніць эфектыўнасць існых абмежавальных мер у дачыненні да беларускіх улад, а таксама разгледзець пытанне аб пашырэнні дзейсных санкцый за кошт павелічэння спіса грамадзян краіны, якім забароняць выдачу віз і замарозяць актывы.