Арганізацыі грамадзянскай супольнасці Беларусі развіваюцца горш як у Азербайджане

Асяродак, у якім працуюць беларускія арганізацыі грамадзянскай супольнасці, значна пагоршыўся ў 2011 годзе пасля прэзідэнцкіх выбараў.

Як адзначаюць аўтары Індэкса ўстойлівасці арганізацый грамадзянскай супольнасці за 2011 год, па выніках масавых пратэстаў супраць фальсіфікацыяў выбараў улады прынялі шэраг рэпрэсіўных законаў, пашырылі адміністратыўныя перашкодыі, узмацнілі ціск на актывістаў і АГС.

Устойлівасць АГС у Беларусі ў 2011 годзе ацэньваецца ў 5,9% балаў. Устойлівасць лічыцца трывалай, калі яе ацэньваюць у 1-3 балы, а калі ў 3-5 балаў - устойлівасць развіваецца. Тым часам абсалютна ўсе паказальнікі за 2011 год па Беларусі перакрочылі мяжу ў пяць балаў – тобок, устойлівасць АГС ускладненая. Так, прававы асяродак эксперты ацэньваюць у 6,9 балаў, арганізацыйнае развіццё – у 5,1, фінасавую ўстойлівасць – у 6,5, адвакатаванне – у 5,8, аказанне паслугаў – у 5,5, інфраструктуру – у 5,4, грамадскі імідж – у 5,9.

З 2000 года найлепшыя паказальнікі па ўстойлівасці АГС, прававому асяродку, фінансавай устойлівасці, адвакатаванні і грамадскаму іміджу ў краіне былі зафіксаваныя ў 2002 – тады яны складалі 5,3, 6,5, 5,7, 5,4 і 5,2 бала адпаведна. Арганізацыйнае развіццё перажывала найлепшыя часы ў 2004 годзе, дасягнуўшы адзнакі ў 4,6 бала. Аказанне паслугаў мела найлепшую адзнаку ў 4,9 бала, гэта было ў 2002 і 2004 годы. Інфраструктура Беларусі найбольш спрыяльнае становішча займала ў 2001-2002 гадах з ацэнкай у 4,5 бала.

У параўнанні з іншымі дзяржавамі Еўразіі (Расіяй, заходнімі краінамі СНД і Казказам), Беларусь знаходзіцца ў найгоршым становішчы. Так, перадапошняе месца па ў рэгіёне па ўсіх паказальніках займае Азербайджан. Вышэйшыя паказальнікі за Беларусь маюць таксама ўсе краіны паўночнага і паўднёвага рэгіёнаў.

Наша краіна апярэджвае хіба што толькі некаторыя краіны Цэнтральнай Азіі. Так, арганізацыйнае развіццё ў горшым становішчы за беларускае маюць Туркменістан і Узбекістан (5,3 і 5,5 бала), адвакатаванне ў Туркменістане ацэньваюць у 6 балаў, ва Узбекістане – у 5,9 бала. Інфраструктура Узбекістана развітая толькі на 5,6 бала. Аднак па ўсіх астатніх паказальніках Беларусь значна адстае ад краін Цэнтральнай Азіі.

Даведка: Індэкс устойлівасці арганізацый грамадзянскай супольнасці (АГСІУ) з’яўляецца галоўным інструмантам вымярэння прагрэса грамадскага сектараў Цэнтральнай і Ўсходняй Еўропы і Еўразіі (E&E рэгіён). Індэкс адсочвае прагрэс грамадскага сектара ў 29 краінах цягам апошніх 15 год. Доследы закранаюць агулам варункі, якія спрыяюць развіццю грамадзянскай супольнасці. Кожнае вымярэнне рэйтынгуецца паводле сямібальнай шкалы, дзе 1 паказвае на вельмі прагрэсіўны ўзровень, а 7 – на нізкі ўзровень развіцця. Індэкс распрацаваны Агенцтвам ЗША па міжнародным развіцці ў партнэрстве з мясцовымі арганізацыямі ў кожнай з тых краін, дзе праходзяць вымярэнні.