Украінскія праваабаронцы нагадалі аматарам футбола пра рэпрэсіі Мінска

Украінскія праваабаронцы 29 чэрвеня звярнуліся да кіраўнікоў дзяржаваў, дыпламатаў і кіраўнікоў міжнародных арганізацый з заклмкам “Не глядзіце футбол разам з дыктатарам!”

Адкрыты заклік, які падпісалі прадстаўнікі пяці ўкраінскіх праваабарончых арганізацый, быў прыняты ў сувязі з планаванай прысутнасцю Аляксандра Лукашэнкі на фінальным матчы Еўра-2012 у Кіеве 1 ліпеня, паведамляе “Радыё Свабода”.

Сярод іншага, украінскія праваабаронцы сьцьвярджаюць:

“Беларускія ўлады ўводзяць усё новыя рэпрэсіўныя захады — жорстка разганяюць мірныя сходы, пераследуюць журналістаў і апазіцыянераў, трымаюць у турме праваабаронцаў. Толькі безумоўнае вызваленне ўсіх палітычных вязняў, адмена рэпрэсіўных захадаў, падтрымка незалежных сродкаў масавай інфармацыі і грамадзянскай супольнасці, павага да вяршэнства права, свабодныя і канкурэнтныя выбары з’яўляюцца адзіным шляхам да таго, каб кіраўніцтва Беларусі мела права заняць годнае месца сярод еўрапейскіх калегаў”.