Збітага міліцыянтамі падлетка аштрафавалі на 250 долараў

У Калінкавічах аштрафавалі раней збітага міліцыяй 17-гадовага Кастуся Рудзеню, а таксама яго сяброўку Наталлю Мальшакову.

Камісія па справах непаўнагадаовых Калінкавіцкага райвыканкаму 26 чэрвеня пастанавіла аштрафаваць Наталлю Мальшакову на 2 млн рублеў, а Кастуся Рудзеню — на 2,1 млн рублёў. Кожны штраф прыблізна складае 250 долараў, перадае “Радыё Свабода”.

На падставе міліцэйскіх рапартаў і апытаньняў Натальлю абвінавацілі ў тым, што яна ў інтэрнэце ў камэнтары наконт збіцьця міліцыяй свайго 17-гадовага сябра “наўмысна абразіла нецэнзурнымі словамі супрацоўнікаў міліцыі пры выкананьні імі службовых паўнамоцтваў”.

Кастусю паставілі ў віну з’яўленьне ў грамадскім месцы ў нецвярозым стане, арганізацыю бойкі і непадпарадкаванне міліцыі. Апрача таго, яму вынесьлі 2 папярэджанні паводле Кодэксу аб адміністрацыйных правапарушэньнях.

Як раней паведамляла Служба інфармацыі “ЕўраБеларусі”, Кастуся Рудзеню збілі ў дзяржаўнае свята 1 мая. На вачах у сотняў сведак супрацоўнікі міліцыі ўтрымлівалі маладога чалавека, які ляжаў у лужыне крыві. Непаўнагадовы пасля “зносінаў” з ахоўнікамі правапарадку быў дастаўлены ў лякарню з пераломам шыі, дыхаць самастойна ён не мог, твар быў знявечаны.

Яго брат Аляксандар Рудзеня засведчыў, што позірк аднаго з праваахоўнікаў “быў накіраваны ў нікуды”, сам мужчына не звяртаў увагі на шматлікія просьбы мінакоў адпусціць хлопца, адно загадваў падначаленым адганяць людзей ад месца здарэння.