Калегія адвакатаў не збіраецца аспрэчваць забарону выезда з краіны Марыне Кавалеўскай

Марына Кавалеўская, адвакат экс-кандыдаты ў прэзідэнты і былога палітвязня Андрэя Саннікава, 7 чэрвеня звярнулася ў Мінскую гарадскую і Рэспубліканскую калегіі адвакатаў, да якіх належыць, з патрабаваннем афіцыйна адрэагаваць на ўключэнне яе ў спіс невыязных з Беларусі.

“Да службовай запіскі я далучыла дакументы з АГІМ МУС і РВК. Акрамя таго, я паведаміла кіраўніцтву калегій аб накіраванні скаргаў у сувязі з гэтай сітуацыяй у МУС, Генеральную пракуратуру і суд Цэнтральнага раёна”, - пыводзіць словы Марыны Кавалеўскай “Хартыя 97”.

Факт адмовы ў выездзе за межы юрыст разглядае як спробу ціску на адваката, што забаронена законам, і як парушэнне яе канстытуцыйнага права на свабоду руху. Аднак праз 12 дзён старшыня Рэспубліканскай калегіі адвакатаў прадставіў наступны адказ:

“...Вам было адмоўлена ў перасячэнні мяжы падчас Вашага знаходжання ў адпачынку, а не падчас выканання прафесійных абавязкаў. У сувязі з гэтым Вам неабходна скарыстацца прадстаўленым правам у сувязі з адмовай у перасячэнні дзяржаўнай мяжы”.

“Такая пазіцыя кіраўніцтва Рэспубліканскай калегіі адвакатаў выклікае выключна шкадаванне. Падобным адказам кіраўніцтва калегіі адвакатаў адхіляецца ад выканання непасрэднай першаснай функцыі - абароны правоў адвакатаў, замацаваных у статуце калегіі і гарантаваных законам”, - лічыць Марына Кавалеўская.

Як раней паведамляла Служба інфармацыі “ЕўраБеларусі”, 6 чэрвеня адваката развярнулі на мяжы. У аддзеле па грамадзянстве і міграцыі Марыне Кавалеўскай заявілі: падставай для адмовы стала ўключэнне яе Міністэрствам абароны ў так званы банк дадзеных невыязных за ўхіленне ад мерапрыемстваў па прызыве на вайсковую службу. У райваенкамаце гэтую інфармацыю абверглі, пацвердзіўшы, што Кавалеўская не з'яўляецца ваеннаабавязанай i на воiнскiм улiку не стаіць.