Арыштаваны журналіст Анджэй Пачобут (відэа)

Личности

Супраць карэспандэнта польскай Gazety Wyborczej завялі крымінальную справу. Яго абвінавачваюць па артыкуле “паклёп на прэзідэнта”.

Падставамі для абвінавачвання сталі артыкулы на сайтах “Хартыя 97” і “Беларускі партызан”. У іх журналіст выказваў меркаванне, што Аляксандар Лукашэнка паўплываў на вынік судовай справы аб выбуху ў мiнскім метро, калі былі прысуджаныя да смерці Уладзіслаў Кавалёў і Зміцер Канавалаў.

Пачобута арыштавалі ў яго доме, там таксама правялі ператрус. Канфіскавалі кампутары. Потым журналіста павезлі на допыт, аднак ён адмовіўся адказваць на пытанні. Пасля гэтага арыштаванага адвезлі ў гарадзенскую турму.

Згодна папярэдняй інфармацыі, справу вядзе следчы Арсеній Нікольскі.

Раней, 5 ліпеня 2011 года, Ленінскі суд Гродна ўжо асудзіў журналіста па частцы 1 артыкула 367 КК (паклёп у дачыненні да прэзідэнта) за яго артыкулы і прысудзіў да 3 гадоў пазбаўлення волі з адтэрміноўкай.

Тады журналіста не пасадзілі ў турму (хоць ён адседзеў у СІЗА тры месяцы да суда) праз ціск з боку Захаду, у прыватнасці, Польшчы (Анджэй Пачобут - беларускі паляк).

Як распавяла жонка журналіста Аксана Пачобут, цяпер яму пагражае да чатырох гадоў пазбаўлення волі. Абараняць Пачобута будзе адвакат Аляксандр Бірылаў, паведамляе “Белсат”.