2013 год абвешчаны Годам Каліноўскага

Личности

У сувязі з 150-мі ўгодкамі вызваленчага паўстаньня 1863 году створаны аргкамітэт па ўшанаванні герояў паўстаньня, а 2013 год абвешчаны Годам Кастуся Каліноўскага.

Першае паседжанне аргкамітэту прайшло ўчора. Сустаршынямі абраныя доктар Янка Запруднік, лідэр руху «За свабоду» Аляксандр Мілінкевіч і кіраўнік кампаніі «Гавары праўду» Ўладзімер Някляеў. Усяго ў аргкамітэт увайшло каля 30 выбітных асобаў беларускага грамадcтва: гісторыкаў, мастакоў, журналістаў, грамадcкіх і іншых дзеячаў.

У планах аргкамітэту — шырока адзначыць 150-я ўгодкі паўстання супольна з літоўцамі і палякамі. Аргкамітэт звярнуўся ва ўрад і Нацыянальны сход Беларусі, ва ўрады і парламенты Літвы і Польшчы з прапановай разам ушанаваць юбілей паўстання.

Аргкамітэт мае прапановы ў Год Каліноўскага правесці навуковыя канфэрэнцыі, мастацкія пленэры і выставы, стварыць фільм, упарадкаваць магілы паўстанцаў 1863 году, паведамляе "Радыё Свабода".