Таварыства аховы помнікаў просіць пакараць міністра культуры за карупцыю

Страшыня Таварыства аховы помнікаў гісторыі і культуры Антон Астаповіч звярнуўся да прэм’ер-міністра Міхаіла Мясніковіча з просьбай “умяшацца ў мінкультаўскія працэсы” і прыцягнуць да дысцыплінарнай адказнасці кіраўніка міністэрства Паўла Латушку.

За 2012 год Таварыства падала ў Мінскульт пяць прапаноў на наданне аб’ектам статуса гісторыка-культурнай каштоўнасці, паведамілі ў арганізацыі. "Першая прапанова пайшла ў пачатку года, другая – амаль два месяцы таму. І з боку Мінкульта – элементарны сабатаж. Прапановы не разглядаюцца. Пра прычыны можна толькі меркаваць ды здагадвацца", - распавёў Антон Астаповіч.

У прыватнасці, прапаноўвалася надаць статус гісторыка-культурнай каштоўнасці падмуркам каталіцкага храма св. Тамаша Аквінскага ў Мінску, жылому драўлянаму дому пачатка ХХ ст. па вул. Акадэмічнай, 3 у Горках (Магілёўская вобл.), 107-мм гармаце ўзору 1910-1930 гг (Расія, СССР) у ансамблі мемарыяла на магіле савецкіх ваеннапалонных у Шаркоўшчынскім раёне (Віцебская вобл.), забудове былой калоніі Варбург па 1-му Мінскаму завулку і вул. Пушкіна ў Брэсце, а таксама будынку былой міквы другой паловы ХІХ ст. у вёсцы Зембін Барысаўскага раёна (Мінская вобл.).

“Мінкульт пад кіраўніцтвам Латушкі пачаў дазваляць сабе адкрыты падман”

"Ніколі не было такіх праяваў у ранейшым. Толькі пад кіраўніцтвам Паўла Латушкі яго падначаленыя сталі дазваляць сабе ігнараванне нарматыўна-прававых дакумантаў, усталяваных заканадаўствам працэдур і нават адкрыты падман у афіцыйнай перапісцы”, - абураны кіраўнік Таварыства аховы помнікаў.

Паводле яго, пералічаныя аб’екты з’яўляюцца “вельмі цікавымі, а часам нават знакавымі”.

“Таму вымушаны мы звярнуцца да кіраўніка ўраду с просьбай асабіста ўмяшацца ў мінкультаўскія працэсы і забяспечыць разгляд нашых прапаноў у самы бліжэйшы час. І ў дадатак – прыцягнуць міністра Латушку да дысцыплінарнай адказнасці. Бо хто іншы, як ні кіраўнік органу дзяржкіравання нясе адказнасць за нармальную і сістэмную працу падраздзяленняў і супрацоўнікаў дадзенага органу?” - запытваецца Антон Астаповіч.

У размове з Службай інфармацыі “ЕўраБеларусі” ён удакладніў, што гэткім чынам плануе паскорыць разгляд прапановаў арганізацыі. Бо Мінкульт абавязаны разглядаць кожную такую прапанову цягам 30 дзён з моманту яе падачы - а з часу падання першай прайшло больш як паўгады.

“У першую чаргу - каб прастымуляваць працэс разгляду прапаноў, якія даўным-даўно павінныя былі разгледзець і якія не разгледжаныя дагэтуль. А па-другое - каб віноўныя сапраўды панеслі за гэта адказнасць, хаця бы дысцыплінарную, каб у наступны раз падобныя парушэнні былі немагчымыя”, - патлумачыў дзяяч.

Ігнараванне прапановаў падпадае пад заканадаўства аб барацьбе з карупцыяй

Калі ж яго не пачуе і кіраўнік Савета міністраў, Антон Астаповіч мае намер скардзіцца на падначаленых самога Міхаіла Мясніковіча.

“Усё гэта трэба прыцягваць да адказнасці. І таму я ў прынцыпе чакаю нармальных дысцыплінарных мераў уздзеяння - ці то заўвагаў, ці то вымоваў - з боку Савета міністраў на міністра культуры. І з боку міністра культуры - на яго падначаленых. Калі гэтага не будзе, буду пісаць у вышэйшыя інстанцыі, каб да дысцыплінарнай адказнасці былі прыцягнутыя адказныя супрацоўнікі не толькі Мінкульта, але і Саўміна. Бо, згодна заканадаўства аб барацьбе з карупцыяй, вывад з-пад адказнасці - гэта карупцыйная праява”, - даводзіць ён.

Разам з тым старшыня Таварыства аховы помнікаў не прагназуе, ці Павал Латушка сапраўды будзе пакараным.

“Не ведаю, ці будзе гэта рэальна, ці не. Але, калі ў мяне не будзе афіцыйнай інфармацыі, што нехта прыцягнуты да адказнасці, буду пісаць у органы пракурорскага нагляду, што ў дадзенай галіне назіраюцца карупцыйныя праявы. А прагназаваць я нічога не магу - проста спадзяюся, што вінаватых пакараюць”, - зазначыў суразмоўца.