Названыя лаўрэаты прэміі “За свабоду думкі”

Лаўрэатамі прэміі імя Васіля Быкава “За свабоду думкі” сёлета сталі краязнаўца, стваральнік і шматгадовы дырэктар краязнаўчага музэю ў вёсцы Гудзевічы ў Мастоўскім Гродненскай вобласці, настаўнік беларускай мовы Алесь Белакоз і музыка, лідэр гурту “Крамбамбуля” Лявон Вольскі.

Прэмія была ўручаная ў вёсцы Бычкі Вушацкага раёну — на малой радзіме Васіля Быкава. Старшыня руху “За свабоду” Аляксандар Мілінкевіч заявіў, што яму вельмі прыемна за такі выбар журы. Галасы падзяліліся пароўну, і гэта засведчыла, што ў Беларусі свабода думкі невычэрпная. “Бо пераможцы — прадстаўнікі цалкам розных пакаленьняў і розных сфераў культуры, але адной справы — свабоды Беларусі”, - цытуе палітыка “Радыё Свабода”.

Прэмія “За свабоду думкі” была " заснаваная рухам “За Свабоду” на ўзор прэміі “За свабоду” імя Сахарава, якой у 2006 годзе быў уганараваны Аляксандар Мілінкевіч. Гэтай прэміяй узнагароджваюць тых, хто, на думку адмысловага журы, яскрава праявіў сябе ў грамадзкай, прафесійнай альбо творчай дзейнасці на карысць Беларусі і свабоды.