Колькасць беларусаў-палітуцекачоў складае амаль 6 тыс. чалавек

Летась колькасць беларусаў, якія падалі звароты па палітычны прытулак ў еўрапейскіх краінах, вырасла больш чым на палову. У 2011 годзе такіх было 1441, хаця яшчэ годам раней - 941.

Такія лічбы дае офіс Вярхоўнага камісара ААН у справах уцекачоў у сваёй справаздачы за 2011 год.

У шэрагу еўрапейскіх краінаў беларускія ўцекачы апынуліся ў дзясятцы найбольш шматлікіх заяўнікаў паводле краіны паходжання. Такая сітуацыя за 2011 год была ў Ісландыі, Літве, Нідэрландах, Польшчы, Фінляндыі, Чэхіі і Эстоніі. Лідэрам тут сталі Нідэрланды – за мінулы год там звярнуліся па палітычны прытулак 256 чалавек з Беларусі, перадае “Радыё Свабода”.

Агулам офіс Вярхоўнага камісара ААН у справах уцекачоў падае лічбу 5925 чалавек, якія на канец 2011 году былі ўцекачамі з Беларусі. З іх 897 чакалі разгляду сваіх заяваў на палітычны прытулак.

Як раней паведамляла Служба інфармацыі “ЕўраБеларусі”, эксперты мяркуюць, што эмігранты могуць вярнуцца ў Беларусь пасля змены ўлады, калі ім забяспечыць належныя ўмовы для жыцця і працы.