Герою Савецкага Саюза Івану Русіянаву ў Мінску паставілі несанкцыянаваны помнік

Незвычайная акцыя ў Мінску: жыхары сталічнага мікрараёна Ўручча паставілі несанкцыянаваны помнік савецкаму генералу Русіянаву.

Людзі спадзяюцца, што помнік абароніць іх сквер ад забудовы. Неўзабаве замест дрэваў тут збіраюцца ўзвесці два шматпавярховікі. 

- Ёсць жа месца, дзе можна будаваць, - кажуць мясцовыя жыхары. - Не трэба чапаць святыя месцы.

Жыхары Ўручча ўжо каторы год дамагаюцца ад уладаў спыніць ушчыльненне мікрараёна, паведамляе "Наша ніва". Але планы будаўніцтва не змяняюцца. Сёлета сабралі больш 4 тысяч подпісаў, гэта 27% дарослага насельніцтва мікрараёна Ўручча-2. Гэта вельмі вялікая лічба. 

Кажуць, кватэры ў гэтых дамах атрымаюць супрацоўнікі міліцыі і спецназу. У мінулым месяцы спецназаўцы павысякалі дрэвы на месцы меркаванай будоўлі. Мясцовыя жыхары спадзяюцца, што хоць помнік герою вайны чапаць не будуць.