“Гавары праўду!” далучаецца да Нацыянальнай платформы

Грамадзянская кампанія “Гавары праўду!” прыняла рашэнне падпісаць Мемарандум аб супрацоўніцтве ў межах Нацыянальнай платформы Форума грамадзянскай супольнасці, а таксама далучыцца да Нацыянальнай платформы.

Пра гэта Службе інфармацыі “ЕўраБеларусі” паведаміў намеснік кіраўніка “Гавары праўду!” Аляксандар Фядута. “Так, мы рыхтуемся да гэтай падзеі”, - пацвердзіў ён.

І патлумачыў, з чым гэта звязана: “Мы з’яўляемся грамадзянскай ініцыятывай, і таму зразумела, што мы бліжэй да грамадзянскай супольнасці, чым да палітычнага сектара. Нягледзячы на тое, што абарона грамадзянскіх правоў патрабуе ад нас у тым ліку і нейкіх палітычных крокаў. Але зразумела, што ў нас шмат чаго супольнага з дзейнасцю тых грамадзянскіх арганізацый, якія ўваходзяць у Нацыянальную платформу. Мы хацелі бы супрацоўнічаць шчыльней”.

Па словах суразмоўцы, афіцыйна пра далучэнне да Нацыянальнай платформы кампанія заявіць да канца месяца. “Я думаю, гэтае пытанне цалкам вырашашыцца напрацягу чэрвеня, мы ўсё аформім”, - паабяцаў Аляксандар Фядута.

Ён таксама патлумачыў, чаму нядаўна з’явілася інфармацыя пра тое, што ўступіць у Нацплатформу вырашыў і Рух “За Свабоду”: такую патрэбу навеяў час.

“Будзем лічыць, што розныя арганізацыі даспяваюць да пэўных крокаў у той момант, калі яны неабходныя. Зразумела, што трэба больш шчыльна каардынаваць сваю працу ў дзейнасці ўсяго грамадзянскага сектрара. І наша разуменне гэтага амаль што супала па часе з тымі высновамі, да якіх прыйшло кіраўніцтва руха”, - зазначыў намеснік лідэра грамадзянскай ініцыятывы “Гавары праўду!”.