Захар Шыбека з’ехаў у Ізраіль, але будзе працягваць навуковую працу i там

Личности

Доктар гістарычных навук Захар Шыбека з’ехаў у Ізраіль на сталае месца жыхарства. У Беларусі ён даследаваў гісторыю гарадоў і з'яўляецца адным з найлепшых спецыялістаў па гісторыі Мінску XIX-XX стагоддзяў.

“Я думаю, што Беларусь мяне не згубіць. Таму што, дзе б я не жыў, я ўсё роўна застаюся беларусам. Пастараюся і ў Ізраілі працаваць на Беларусь, на беларускую ідэю", - цытуе навукоўца “Еўрарадыё”.

Захар Шыбека выляцеў у Ізраіль з Мінска 7 червеня. Ён паведаміў, што будзе часова жыць у Хайфе, але спадзяецца працаваць у архівах і бібліятэках Іерусаліма ды Тэль-Авіву. Найперш навуковец збіраецца вывучыць іўрыт.

"Матывы самыя простыя, самыя людскія. Любоў! Я еду да любімай жанчыны. Хачу аб'яднаць з ёй свой лёс. Так атрымалася, што яна выбрала Ізраіль, а я выбраў яе!" - дадаў Захар Шыбека.

У Беларусі гісторык сярод іншага супрацоўнічаў з Лятучым універсітэтам.

“Вельмі шкада, што ён з’ехаў назаўжды! Бо за ім паўставаў цэлы напрамак пра гарадскія даследванні. Праўда, Ізраіль - не Марс, я думаю, Захар Васільвіч будзе і далей працягваць сваю навуковую працу”, - паведаміла Службе інфармацыі “ЕўраБеларусі” старшы аналітык Цэнтра еўрапейскай трансфармацыі, кандыдат сацыялагічных навук Тацяна Валадажская.

Яна заўважыла, што з Беларусі выехала ўжо шмат іншых навукоўцаў, якім гэта не перашкаджае прававаць дзеля дабра сваей радзімы.

“Безумоўна, кепска, што ад нас з’язжаюць. Кепска, што спадар Захар не будзе знаходзіцца ў непасрэдным кантакце ў Мінску, у Беларусі. Але для навукоўца гэта не самае страшнае. Тым болей, што з’ехаў ён не з палітычных прычынаў ці праз праблемы са здароўем, а па асабістых абставінах. Каханне - справа добрая”, - дадала Тацяна Вадалажская.

Яна звярнула ўвагу на тое, што Захар Шыбека можа наведваць Беларусь і прымаць удзел у значных акадэмічных падзеях краіны.

“Даволі шмат навукоўцаў жывуць за межамі Беларусі - і працуюць у Беларусі. Тым больш, Захар Шыбека - не персона нон-грата, можа і прыязджаць да нас. Наколькі мне вядома, ён збіраўся ўдзельнічаць у Другім кангрэсе даследчыкаў Беларусі. Лепей, канешне, калі інтэлектуалы ёсць тут. Але пераезд у іншую краіну - нармальная справа”, - падсумавала сацыёлаг.