Уладзімір Мацкевіч: Далучэнне Сербіі да санкцыяў - удар па ідэялогіі рэжыма

Афіцыйны Мінск ніяк не чакаў, што сербскія ўлады зоймуць пазіцыю Еўрасаюза. Так лічыць кіраўнік Рады Міжнароднага кансорцыюма “ЕўраБеларусь”, філосаф і метадолаг Уладзімір Мацкевіч.

У пятніцу, 8 чэрвеня, з’явілася афіцыйнае паведамленне, што да абмежаванняў ЕС супраць беларускіх уладаў далучыліся яшчэ сем краінаў - Харватыя, Македонія, Чарнагорыя, Ісландыя, Сербія, Албанія і Ліхтэнштэйн.

“З аднога боку, большасць гэтах дзяржаваў насамрэч не могуць ужыць ніякіх санкцыяў адносна Беларусі. Бо яны альбо амаль не ўдзельнічаюць у гандлі з нашай краінай, альбо іх доля ў гандлёвых стасунках з Мінскам настолькі малая, што ніякага ўплыву санкцыі тут мець не могуць”, - заўважыў Уладзімір Мацкевіч.

Пералічаныя краіны далучыліся да абмежаванняў ЕС супраць афіцыйнага Мінска хутчэй сімвалічна. “Сімвалічнае значэнне гэтых санкцыяў, так бы мовіць, падвойнае. Калі браць Ліхтэнштэйн ці некаторыя малыя краіны - гэта адна справа. Нават калі разглядаць Харватыю, якая зараз з’яўляецца найбольш верагодным кандыдатам на ўступленне ў Еўрасаюз, дык яе пазіцыя адносна Беларусі зразумелая”, - зазначыў суразмоўца.

А вось рашэнне Сербіі далучыцца да санкцыяў, хай сабе сімвалічных, ужо мае сур’ёзнае значэнне.

“Сербія Беларуссю разглядалася як адзін з магчымых хаўруснікаў па палітыцы недалучэння. У беларускага рэжыму былі (ці ёсць?) пэўныя спадзяванні, ілюзіі адносна адзінай палітыкі ўсіх славянскіх краінаў. Тым больш, Сербія перажыла агрэсію з боку ЗША і Еўропы. І таму, на думку “славянафілаў” кшталту кіраўніка Беларускага славянскага камітэта Сяргея Касцяна ды іншых, Сербія павінна быць стойкім прыхільнікам беларускага прэзідэнта, а не далучацца да санкцыяў. Гэта такі сімвалічны ўдар па ідэялогіі беларускага рэжыма”, - упэўнены эксперт.

У сакавіку Еўрасаюз уводзіў абмежаванні адносна беларускага кіраўніцтва на фоне дыпламатычнага канфлікта. Тады Мінск папярэджваў, што вяртанне амбасадараў краін ЕС у Беларусь будзе залежыць ад рашэння наконт санкцыяў. Аднак зараз рэжым не зацікаўлены пагаршаць стасункі з Захадам.

“Асаблівай рэакцыі ўладаў чакаць не варта. Хутчэй за ўсё, у адказ будзе проста маўчанне ці адін раз у навінах прагучаць ідэялагічныя абурэнні, не больш за тое. Не думаю, што ў інтарэсах рэжыма зараз варагаваць з Еўропай”, - кажа Уладзімір Мацкевіч.

Як раней паведамляла Служба інфармацыі “ЕўраБеларусі”, пра далучэнне да санкцыяў ЕС заяўлялі і іншыя краіны - напрыклад, ЗША.