Святароў працягваюць пераследаваць за адмову ад дактыласкапіі

У Гродна прадстаўнікі дзяржаўных структур узмацнілі кампанію па дактыласкапіі жыхароў. У практыку ўведзены абыход па кватэрах з прапановай “адкатаць пальчыкі” грамадзянам, якія не захацелі з’явіцца ў аддзяленне міліцыі, проста дома.

Закранула гэтая тэндэнцыя і праваслаўных святароў. Некаторыя з іх адмаўляюцца прайсці гэтую працэдуру, іншыя – пагаджаюцца. Царкоўныя ўлады адназначнага стаўлення да такой прымусовай дактыласкапіі не выказваюць.

Тым часам на айца Мікалая Гайдука, які служыць у храме Адсячэння галавы Яна Хросніка на вуліцы Урублеўскага, завялі адміністрацыйную справу нібыта за непадпарадкаванне службовым асобам пры выкананні тымі сваіх абавязкаў па абавязковай дактыласкапіі. Айцец Мікалай не згодзен з такой трактоўкай міліцыяй сітуацыі, паколькі пратакол быў складзены завочна з відавочнымі парушэннямі заканадаўства, і мае намер дамагацца справядлівасці.

Зараз айца Мікалая, аднаго з маладзейшых святароў гораду, выклікаюць у суд Ленінскага раёну. Працэс распачнецца 12 чэрвеня а 14-ай гадзіне, паведамляе Праваабарончы цэнтар “Вясна”.

Нагадаем, новы этап абавязковай дактыласкапіі пачаўся пасля выбуха 11 красавіка 2011 года ў мінскім метро. Шмат вернікаў, у тым ліку праваслаўныя, ад гэтай працэдуры адмаўляліся.

У ліпені 2011 года за адмову ад дактыласкапіі быў аштрафаваны святар Ігар Прылепскі з Вілейкі, у лютым 2012 года – праваслаўны вернік Максім Алямоўскі з Магілёва. У выніку пытанне наконт дадзенай працэдуры ўзнялі на агульным сходзе духавенства Мінской дыяцэзіі БПЦ, яго адрасовалі дзяржаўным структурам.