За акцыю ў падтрымку польскамоўнай школы – штраф у 600 долараў

Віцэ-старшыні не прызнанага беларускімі ўладамі Саюза палякаў Рэнаце Дзямянчук прысудзілі штраф у 5 млн. рублёў (каля 600 долараў) за ўдзел у несанкцыянаванай акцыі ў Гродна.

Такое рашэнне прыняла суддзя Ленінскага гарадскога суда Ксенія Стасюкевіч. Як распавяла Рэната Дзямянчук, суддзя ўлічыла паказанні толькі сведак-міліцыянтаў, якія блытана сцвярджалі, што намесніца старшыні Саюза палякаў брала актыўны ўдзел у акцыі, крычала і махала рукамі. Паказаньні самой жанчыны пад увагу не ўзялі, перадае “Радыё Свабода”.

Рэната Дзямянчук — ужо дзевятая асоба, асуджаная за ўдзел у несанкцыянаванай акцыі Саюза палякаў. Прыкладам, грамадскага актывіста Эдварда Дзьмухоўскага за ўдзел у мерапрыемстве аштрафавалі на 4,5 млн. рублёў (каля 540 долараў).

Па словах актывіста, ён не ўдзельнічаў у акцыі, а толькі праходзіў побач і заўважыў, як людзі ў цывільным цягнуць у аўтобус яго сябра Ігара Банцара. Тады арыштавалі і Эдварда.

Справу Дзьмухоўскага разглядалі 6 чэрвеня, але суддзя не вынесла рашэння, паколькі на прадстаўленым міліцыянтамі відэазапісе Дзьмухоўскага не было. Пазней, 7 чэрвеня, суддзя Наталля Козел спаслалася на сведчанні міліцыянтаў і на гэтай падставе вынесла прысуд.

Як раней паведамляла Служба інфармацыі “ЕўраБеларусі”, несанкцыянаваны пікет супраць увядзення ў школе №36 з польскай мовай навучаньня расійскамоўных клясаў праходзіў у Гродна 1 чэрвеня і быў разагнаны сілавымі структурамі.

На акцыі затрымалі 18 чалавек. Восем з іх ужо асудзілі: Ігар Банцар атрымаў 13 сутак арышту, астатнія - штрафы у 1-5 млн. рублёў. Пры разгоне пікета міліцыянты дзейнічалі вельмі жорстка і нават парвалі польскі дзяржаўны сцяг.