Беларусь займае першае месца ў свеце па колькасці шэнгенскіх візаў на тысячу грамадзянаў

На аднаго чалавека Беларусь атрымлівае болей за ўсё шэнгенскіх візаў тыпу С у свеце. І гэтак другі год запар. 

Паводле дадзеных Еўрапейскай камісіі, па гэтым паказчыку з вялікім адрывам мы абганяем суседнія Украіну і Расію.

Краіны Шэнгенскай прасторы выдалі беларусам у 2011 годзе каля 580 тысячаў візаў тыпу С (кароткатэрміновых, па якіх можна знаходзіцца ў Еўрасаюзе не болей за 90 дзён на паўгады). Гэта на 150 тысячаў болей, чым у мінулым годзе. Для параўнання, кітайцы, якіх на свеце ўжо болей за мільярд, атрымалі каля мільёна шэнгенскіх візаў, а туркі, якіх у сем разоў болей за беларусаў — толькі 592 тысячы.

Яшчэ адна характэрная асаблівасць мінулага году — рост колькасці выдадзеных нам візаў, які непараўнальны амаль зь ніводнай краінай свету. Хаця гэта не дазволіла Беларусі ўзняцца ў рэйтынгу краін свету па абсалютнай колькасці выдадзеных візаў. Наша краіна як і год таму займае ў ім пятае месца. Недзе паміж Турцыяй і Індыяй. Не змяніўся і лідэр гэтага спісу: расіяне займаюць першы радок у лісце тых, хто мае больш за ўсё шэнгенскіх візаў. У мінулым годзе яны займелі 5 мільёнаў такіх налепак у пашпартах, паведамляе generation.by.