Human Rights Watch патрабуе вызваліць Алега Волчака

Міжнародная праваабарончая арганізацыя Human Rights Watch заявіла, што беларускія ўлады помсцяць праваабаронцу Алегу Волчаку за крытыку ў свой адрас.

“Беларускія ўлады павінныя неадкладна вызваліць вядомага праваабаронца Алега Волчака, які быў асуджаны па палітычна матываваным абвінавачванні ў адміністрацыйным правапарушэнні”, - адзначаецца ў заяве Human Rights Watch, апублікаванай на сайце арганізацыі 30 траўня.

“Алег Волчак, кіраўнік арганізацыі па прававой дапамозе насельніцтву, быў затрыманы 24 траўня 2012 года. Судовы пераслед, падставы дзеля якога выклікаюць сумневы, з'яўляецца яскравым прыкладам таго, што беларускія ўлады робяць больш жорсткім кантроль за грамадзянскай супольнасцю, - сказаў Х'ю Уільямсан, дырэктар праграм арганізацыі для Еўропы і Цэнтральнай Азіі. - Урад павінен спыніць пераслед праваабаронцаў і дазволіць групам грамадзянскай супольнасці дзейнічаць не баючыся рэпрэсій”.

Human Rights Watch раней неаднаразова падвяргала крытыцы беларускія ўлады за пераслед актывістаў апазіцыі, адвакатаў, а таксама за забарону на ўезд у краіну для замежных праваабаронцаў. Таксама, арганізацыя адзначае, што многім актывістам апазіцыі, праваабаронцам і журналістам у апошні час забаронены выезд з Беларусі пад рознымі падставамі.

“Арышт і асуджэнне Алега Волчака - гэта не больш за дрэнна схаваную спробу беларускіх уладаў запалохаць і прымусіць замаўчаць яшчэ аднаго нязгоднага з імі”, - прыводзіць словы Уільямсана “Хартыя 97”. - Выкарыстанне судоў як інструмента рэпрэсій - гэта скажэнне вяршэнства закона”.