Алег Хаменка: Выступ Litesound быў прыгожы, нармальны, то бок - незаўважны

Беларускі гурт Litesound у фінал конкурсу “Еўрабачанне” не прайшоў. Чаго ж не хапіла нашым, каб заваяваць сэрцы еўрапейскіх гледачоў? Сваё меркаванне Службе інфармацыі “ЕўраБеларусі” выказаў музыка і культуролаг Алег Хаменка.

Суразмоўца параіў спачатку “разабрацца з тым, чаго было досыць, каб потым гаварыць аб тым, чаго не хапіла”, і папярэдзіў, што не можа шчыра распавесці на прастору СМІ тое, што думае на конт “Еўрабачання”, хіба што здольны зрабіць гэта ў прыватных размовах.

-Я вымушаны размаўляць эзопавай мовай, калі кажу пра “Еўрабачанне”, - прызнаецца Алег Хаменка. – Разумееце, “Еўрабачанне” ўжо ўсіх раздражняе. Гэта дурны тон – абмяркоўваць поспех ці няпоспех. Ад сябе магу дадаць, што відавочна нашы хлопцы выступілі на максімуме сваіх магчымасцяў. Але пры гэтым яны балансавалі на мяжы “залік – незалік”.

Але на пытанне Службы інфармацыі "ЕўраБеларусі", на колькі балаў па дзесяцібальный сістэме ён бы ацаніў выступ Litesound, суразмоўца нецэнзурна аджартаваўся.

У такім выпадку, што ж менавіта не спадабалася еўрапейскім гледачам - сама песня беларусаў альбо шоу?

- У дадзеным выпадку не трэба разважаць у катэгорыях “спадабалася – не спадабалася”. Пры галасаванні на “Еўрабачанні” працуе прынцып “заўважылі – не заўважылі”, звярнулі ўвагу на выканаўца ці не, - тлумачыць Алег Хаменка. – Я ўвогуле не хачу абразіць нашых хлопцаў, бо пэўныя намаганні імі сапраўды былі прыкладзеныя. Але ў Litesound выступ быў вельмі прыгожы, вельмі нармальны, а гэта значыць – стандартны, таму ў некаторым сэнсе – незаўважны!

Так і ўяўляецца дыялог з сярэднестатыстычным гледачом “Еўрабачання”: “Што вы думаеце пра выступ беларусаў”? – “О, усё было вельмі прыстойна і прыгожа!” – “Дык чаму ж вы за іх не галасавалі?” – “Эээ… а хто там быў? Нешта я іх не памятаю…”

Музыка дадаў, што асабіста яму спадабаўся выступ спявачкі Лорын (Швецыя), і ён бы хацеў, каб менавіта яна перамагла ў фінале.

- Апошнія гады гледачы “Еўрабачання” галасуюць за “мілых коцікаў”, а гэтая дзяўчына прадставіла новы фармат, яе выступ быў яркі і заўважны. Хацелася б, каб адпаведныя эмоцыі мы б перажывалі ад шоу нашых суайчыннікаў, - пажадаў Алег Хаменка.