Запрашаем на "Праменад у парку мрояў"

24 мая, калі адзначаецца еўрапейскі дзень паркаў, на сцэне Малой залы філармоніі адбудзецца музычна-паэтычная вандроўка са старымі і новымі знаёмымі “Праменад  у парку мрояў". 

Музыканты ансамбля салістаў “Класік-авангард" пад кіраўніцтвам заслужанага дзеяча мастацтваў Рэспублікі Беларусь Уладзімірам Байдавым тыя мроі перакладуць на мову музыкі.

Сама музыка, летуценная, рамантычная, ціха і лёгка, пяшчотна і радасна распавядзе нам пра забытае жыццё старых паркаў, пра тое, якімі гукамі поўніліся алеі, сцежкі, паветра паважнага Нясвіжу.

Паколькі нашыя паркі закладаліся пераважна на італьянскі і ангельскі ўзоры, у канцэрце будзе гучаць італьянская і ангельская паэзія, якая магла чытацца у салонах тога часу. Вершы Дантэ, Петраркі, Шэкспіра, Шэлі, Байрана, Бёрнса загучаць па-беларуску, а таксама кавалак з Міцкевіча, які натхніў аднога музыку на стварэнне цудоўнага паланэзу. А яшчэ - вершы Кітса і Байрана, прысвечаныя Тадэвушу Касцюшку - гаспадару адной з сядзіб музычнага падарожжа. А малады кітайскі барытон Чжан Юань засьпявае "Серэнаду" Казлоўскага па-беларуску.

Абуджаць фантастычныя мроі-сны разам з музыкантамі “Класік-Авангарда” будуць вядучая Святлена Немагай, рэжысёр Ірына Дубянецкая, танцавальны гурт “Гісторыка”, школа старадаўняга танца “Залаты двор” , чытальнік Максім Брагінец.

- Канцэрт абяцые быць элегантны, лёгкі, прыгожы і адначасова адукацыйны і інфармацыйны. І вельмі-вельмі беларускі, - кажа Ірына Дубянецкая.