Уладзімір Мацкевіч: Пуцін будзе вытрымліваць дыстанцыю ад Лукашэнкі

Уладзімір Пуцін пасля свайго чарговага прызначэння на пасаду прэзідэнта РФ збіраўся першы візіт нанесці ў Мінск. Нечакана ён перагледзеў рашэнне і памяняў Беларусь на Казахстан. Што значыць гэтае перасоўванне, патлумачыў старшыня Рады Міжнароднага кансорцыюма “ЕўраБеларусь”, філосаф і метадолаг Уладзімір Мацкевіч.

“Звычайна першы візіт кіраўніка дзяржавы ў іншую краіну напаўняецца пэўным сімвалічным сэнсам. Гэта, так бы мовіць, дэманстрацыя найбольш цеснага хаўрусу ці найбольш значнага партнэра для дадзенай краіны, пэўная заяўка на далейшую міжнародную палітыку. І таму, незалежна ад зместу пытанняў, якія будуць абмяркоўваць падчас першага візіту, сама галоўнае - гэта яго сімвалічны змест”, - зазначыў эксперт.

Ён нагадаў, што традыцыйна кіраўнікі Расіі першую сваю паездку пасля планавалі ў Беларусь і Украіну.

“І сёння - я думаю, традыцыйна - было запланавана, што Пуцін прыедзе ў Беларусь. Аднак потым расійскія дыпламаты ці паліттэхнолагі ўсвядомілі, што такая дэманстратыўная паездка будзе не на карысць расійскага іміджу. Незалежна ад таго, што другі візіт прэзідэнта ўсё адно будзе ў Беларусь. Але, першы павінны быць да найбліжэйшага хаўрусніка. А падчас выбарчай кампаніі Пуціна быў створаны Еўразійскі саюз, таксама дэманстратыўны і сімвалічны. У гэтым саюзе, напэўна, Казахстан выглядае больш прывабным для першай паездкі”, - мяркуе філосаф.

Па словах Уладзіміра Мацкевіча, перанос першага візіта кіраўніка Расіі паказвае, што той мае намер трымаццца на адлегласці ад Аляксандра Лукашэнкі.

“Гэта будзе сведчыць пра тое, што расійскі прэзідэнт сёння не цалкам падтрымоўвае палітыку беларускага і будзе вытрымліваць пэўную дыстанцыю ад Лукашэнкі”, - дадаў эксперт.