Міхася Мускага вывезлі ў войска

Личности

У аўторак, 15 траўня, актывіста “Маладога Фронта” Міхася Мускага вывезлі з ізалятару на Акрэсціна ў Мінску ў вайсковую частку пад Лепель.

Там у вёсцы Межыца дыслакуецца 29-я ракетна-зенітная частка Узброеных сілаў Рэспублікі Беларусь, куды прымусова накіраваны на службу актывіст. Пра гэта ён паведаміў сваім паплечнікам. На дадзены момант звязь і Міхасём адсутнічае, піша сайт “Маладога Фронту”.

У 2009 годзе маладога чалавека прызналі непрыдатным да службы ў войску з прычыны падвышанага ціску. У 2012 годзе, пасля адсідкі за перфаманс каля будынка МЗС, яго пад канвоем прывезлі ў ваенны шпіталь, дзе “спраўдзілі”, што хлопец раптам “стаў гатовы да службы ў войску”.

Апошнія паўгады Міхась Мускі вельмі часта праводзіў за кратамі, з пачатку 2012 года ён агулам прабыў у ізалятары на Акрэсціна каля 50 дзён, а таксама два тыдны у вайсковым шпіталі.

Як раней паведамляла Служба інфармацыі “ЕўраБеларусі”, Міхась Мускі 11 траўня павінен быў вызваліцца пасля адміністрацыйнага арышту за ўдзел у “Чарнобыльскім шляху”. Аднак яго пакінулі пад вартай, а 14 траўня хлопцу прысудзілі нібыта за дробнае хуліганства яшчэ пяць дзён арышту.

Раней, 2 траўня, яму адмовілі ў праве на альтэрнатыўную службу.