У Дні вулічнай музыкі ў Вільні прымуць удзел 17 гуртоў з Беларусі

Упершыню выканаўцы з Беларусі атрымалі магчымасць падаць заявы на ўдзел у штогадовым свяце, што праводзіцца ў Вільні.

У Дзень вулічнай музыкі ўвесь цэнтр горада пераўтвараецца ў вялізную музычную пляцоўку. Паўдзельнічаць у ім выказалі жаданне 17 гуртоў з Беларусі.

"Мы вельмі рады, што столькі выканаўцаў адгукнуліся на нашу ініцыятыву дадаць беларускага каларыту ў гэтае музычнае свята", — кажа Кірыл Атаманчык, кіраўнік моладзевай асацыяцыі StudAlliance. Гэтая арганізацыя выступіла ініцыятарам удзелу музыкаў з Беларусі ў Дні вулічнай музыкі ў Вільні і праз партал Tuzin.FM абвясціла пра прыём заяваў ад айчынных выканаўцаў.

"Мы атрымалі 17 заяваў ад гуртоў і выканаўцаў. Агулам гэта каля 70 чалавек, якія паўдзельнічаюць у свяце з беларускага боку. Гэта вельмі добры паказнік, улічваючы, што час на падрыхтоўку быў вельмі абмежаваны", — зазначае Кірыл і дзякуе разам з тым Міністэрству замежных справаў Літвы і дыпламатычным прадстаўніцтвам гэтай краіны, якія актыўна спрыяюць міжкультурнаму дыялогу Літвы і Беларусі.

Сярод тых, хто возьме ўдзел у свяце 19 мая з беларускага боку — рок- і фолк-выканаўцы, бубначы, фаер-шоў калектыў і нават тэатр. З гуртоў у Вільні выступяць "Da!Бл…", Blakitna Band, "Мамкіны бусы", B.M.O.ды іншыя каманды. Ёсць спадзяванні, што ўсе тыя, хто заявіўся, своечасова атрымаюць візы. Пра гэта цяпер клапоцяцца арганізатары свята. Яны, дарэчы, раяць усім беларусам, хто мае візы, абавязкова наведаць у гэты дзень Вільню, дзе іх чакае яшчэ нямала сюрпрызаў.