Брат збітага ў Калінкавічах: Міліцыянт быў шалёным

Сваякі пацярпелага ад міліцыянтаў у Калінкавічах непаўнагадовага Канстанціна Рудзені далі інтэрўю.

Сам малады чалавек кажа, што амаль нічога не памятае - толькі тое, што прасіў міліцыянта, каб падняў яго, бо не мог дыхаць. Супрацолўніка міліцыі, што яго біў, пацярпелы называе неадэкватным, перадае “Белсат”.

Яго брат Аляксандар Рудзеня сведчыць, што позірк праваахоўніка “быў накіраваны ў нікуды”, сам мужчына не звяртаў увагі на шматлікія просьбы мінакоў адпусціць хлопца, адно загадваў падначаленым адганяць людзей ад месца здарэння.

Маці Канстанціна Рудзені ўпэўненая, што дактары супрацоўнічаюць з міліцыянтамі: сына, які не мог стаяць на нагах, выпісалі дахаты. Канстанціна на каталцы падвезлі да таксоўкі ды туды выгрузілі.

Адвакат пацярпелага Віктар Чабатароў мяркуе, што міліцыянты спрабуюць “замесці сляды” злачынства – пра гэта сведчыць тое, што збітага не накіравалі збітага на экспертызу.

“Гэта грубае парушэнне крымінальна-працэсуальнага заканадаўства”, - заўважыў юрыст.

Апрача таго, супрацоўнікі міліцыі таксама не прайшлі экспертызу – напрыклад, на прадмет наяўнасці алкаголю ў крыві. “Замест гэтага шантажуюць відавочцаў”, - дадаў Віктар Чабатароў.

Як раней раведамляла Служба інфармацыі “ЕўраБеларусі”, Канстанціна Рудзеню збілі ў дзяржаўнае свята 1 мая. На вачах у сотняў сведак супрацоўнікі міліцыі ўтрымлівалі маладога чалавека, які ляжаў у лужыне крыві. Непаўнагадовы пасля “зносінаў” з ахоўнікамі правапарадку быў дастаўлены ў лякарню з пераломам шыі, дыхаць самастойна ён не мог, твар быў знявечаны.

 Міністэрства унутраных справаў адмовілася каментаваць інцыдэнт.