Уладзімір Мацкевіч: Адкласці прамову Лукашэнку вымусіў тупік, у які ён завёў дзяржаву

У Аляксандра Лукашэнкі сапраўды былі падставы раней адкласці выступ перад беларускім народам і парламентам. У вынiку, ен адбудзецца сення, 8 траўня. Прычына адкладвання - відавочнасць тупіка, у які прэзідэнт завёў палітыку дзяржавы. Такога меркавання прытрымліваецца кіраўнік Рады Міжнароднага кансорцыюма “ЕўраБеларусь”, філосаф і метадолаг Уладзімір Мацкевіч.

“Паколькі гэтая падзея затрымалася на месяц, трэба чакаць, што ў тэкст паслання ўнесеная значная карэкціроўка. Чаго яна будзе тычыцца? Я думаю, у першую чаргу гэта звязана з міжнароднай палітыкай. Па-другое, усім зразумела, што на сённяшні дзень у беларускага прэзідэнта і ўрада няма слушнай прапановы па развіццю эканомікі, гаспадаркі краіны і г.д. Тыя прапагандысцкія прамовы, якія гучаць па тэлебачанні ці ў звычайных заявах кіраўнікоў міністэрстваў і Адміністрацыі прэзідэнта не могуць задаволіць ні сам склад ураду, ні бізнэсоўцаў, ні грамадзян краіны. Думаю, гэтая паўза была ўзятая для таго, каб выправіць прапановы ці тлумачэнне таго, што зараз адбываецца з дзяржавай ва ўсіх галінах”, - кажа эксперт.

Аднак ён не бярэца прадказаць, якімі менавіта будуць змены ў прамове беларускага кіраўніка.

“Што канкрэтна скажа Лукашэнка, мне нават цяжка ўявіць. Шчыра кажучы, не вельмі разумею, што там будзе... Бо, ведаючы праграму і той кірунак, у якім сённяшні рэжым вядзе краіну, я не бачу нейкіх станоўчых прапаноў. Патрэбны досыць кардынальныя змены ва ўсёй палітыцы,а сённяшні рэжым, здаецца, да гэтага не гатовы”, - канстатуе Уладзімір Мацкевіч.

Пры гэтым у Аляксандра Лукашэнкі меліся рэальныя падставы адкласці сваю прамову перад беларускім народам.

“Канешне, былі сур’ёзныя падставы. Бо той тупік, у які рэжым завёў палітыку дзяржавы, відавочны нават кожнаму з прыхільнікаў рэжыма, нават самім адказным асобам, якія яго ўзначальваюць”, - перакананы кіраўнік Рады “ЕўраБеларусі”.

Тым не менш, наўрад ці ў краіне нешта зменіцца пасля выступлення прэзідэнта 8 траўня. “Не бачу ніякіх падстаў і чыннікаў, каб чакаць нейкіх кардынальных змен. Хутчэй за ўсё, мы пачуем апраўдалкі, тлумачэні, можа быць, новую рыторыку. Але ж не рэальныя прапановы”, - упэўнены філосаф.

Уладзімір Мацкевіч таксама адзначыў, што Аляксандар Лукашэнка зараз наўрад ці будзе імкнуцца працягваць канфлікт з Еўрасаюзам.

“На момант сакавіка-красавіка палітыка Беларусі ў дачыненні да ўсіх суседзяў, у першую чаргу, да Захада, падавалася цалкам тупіковай і безперстпектыўнай. І далейшае абвастрэнне ў гэтым сэнсе зрабіла б нашую сітуацыю ў краіне ўвогуле цяжкай. Таму, думаю, якраз варта чакаць нейкіх лагодных захадаў у галіне міжнароднай палітыкі, лагодных захадаў у бок ЕС, а не абвастрэння”, - мяркуе эксперт.

На яго думку, пра гэта сведчыць і прагненне беларускага прэзідэнта сустрэцца з кіраўнікамі дыпмісій краін ЕС.

“Недарэмна зараз Лукашэнка запрасіў да сябе амбасадараў заходніх краін. Напэўна, для абвяшчэння нейкіх карэкціровак у дачыненнях з Захадам. Думаю, што тая прамова, з якой ён выступіць перад амбасадарамі, і пасланне да народа Беларусі будуць адрознівацца толькі некаторымі рэверансамі. У пасланні захаваецца больш канфрантацыйная рыторыка, а да дыпламатаў Лукашэнка звернецца калі не з прабачэннямі, дык з прапановамі па змякчэнні, улагоджванні адносін”, - зазначыў Уладзімір Мацкевіч.