У Брэсце міліцыя сарвала канцэрт анархістаў

Пад Брэстам супрацоўнікі міліцыі разагналі канцэрт анархістаў і затрымалі 11 чалавек. Актывістаў паставілі на фота- і відэаўлік, на некаторых склалі адміністратыўныя пратаколы.

Паводле прэс-службы мясцовага ўпраўленьня ўнутраных спраў, “на мерапрыемстве прысутнічала больш за 150 асобаў, у тым ліку прадстаўнікоў розных рэгіёнаў Беларусі, а таксама Ўкраіны і Польшчы. Яны абмяркоўвалі пляны сумеснай арганізацыі скаардынаваных дзеянняў экстрэмісцкага характару, накіраваных на парушэньне грамадскага парадку і бяспекі”.

У інфармацыі прэс-службы Брэсцкага УУС паведамляецца, што на гэтым сходзе “выказваліся лозунгі ў падтрымку анархістаў, затрыманых у Мінску і асуджаных за закідваньне бутэлькамі з запальнай сумесьсю амбасады Расійскай Фэдэрацыі ў Рэспубліцы Беларусь. Акрамя таго, на прыкладзе апошніх падзеяў у Польшчы, калі анархісты правялі шэсце па цэнтральных вуліцах Варшавы, прапаноўвалася скаардынаваць дзеянні па міжнароднай супрацы з выездам на месцы правядзення акцыяў”.

Аднак прадстаўнікі анархісцкага руху Брэста не пагаджаюцца з такой фармулёўкай. Як распавёў анархіст, які не пажадаў назваць сваё імя, міліцыя разагнала звычайны рок-канцэрт, а не “экстрэмісцкі злёт”.

“Там не было ніякага злёту анархістаў, быў звычайны канцэрт на адкрытым паветры ў лесе за Берасцем. Ён меўся быць усю ноч. Аднак гадзіны а другой уночы хлопцы, якія раней з’ехалі, пабачылі, што туды едуць аўтазакі. Яны папярэдзілі, патэлефанавалі. Таму там практычна ўсе змаглі схавацца. Наконт таго, што там нейкі міжнародны з’лёт быў — гэта няпраўда. У асноўным там былі брэсцкія. Гэта быў проста канцэрт, на якім выступалі рок-гурты”, - цытуе маладога чалавека “Радыё Свабода”.

Затрыманых вызвалілі праз тры гадзіны.

Як раней паведамляла Служба інфармацыі “ЕўраБеларусі”, 24 сакавіка ў Мінску сілавыя структуры разагналі канцэрт кампаніі “Ежа замест бомбаў”. Удзельнікаў мерапрыемства затрымалі, аднаго з іх сур’ёзна збілі.

Іншага актывіста кампаніі, студэнта пятага курса Беларускага нацыянальная тэхнічнага універсітэта, супрацоўнікі КДБ намагаліся прымусіць да “супрацоўніцтва”, замкнуўшы ў дэканаце ВНУ.