IBB адмовіў Асамблеі НДА ў памяшканні для Кангрэса

Пад пагрозай правядзення чарговы, сёмы па ліку, справаздачна-выбарны Кангрэс Асамблеі няўрадавых дэмакратычных арганізацый Беларусі.

Мерапрыемства планавалася 5-6 траўня ў Міжнародным адукацыйным цэнтры (IBB) у Мінску. Падчас свайго форума прадстаўнікі арганізацый-сябраў Асамблеі НДА меліся абраць новае кіраўніцтва, а таксама абмеркаваць стан беларускай грамадзянскай супольнасці, развіццё рэгіянальных ініцыятыў, пашырэнне грамадскага дыялёгу і ўзаемадзеянне з палітычным сектарам.

Між тым, стала вядома, што кіраўніцтва Міжнароднага адукацыйнага цэнтра адмовіла заяўнікам у памяшканні, дзе апошнім часам прадстаўнікі "трэцяга сектара" мелі сталую дыскусійную пляцоўку. Прычыны адмовы ўдакладняюцца, паведамляе "Радыё Свабода".

Напярэдадні кіраўнік выканаўчага бюро Асамблеі няўрадавых дэмакратычных арганізацый Сяржук Лісічонак расказаў Службе інфармацыі "ЕўраБеларусі" пра мэты Кангрэса:

"Гэта вялікі форум, на які прадстаўнікі грамадскіх арганізацый разнастайных інтарэсаў могуць прыехаць і прыняць удзел. Гэты кангрэс праводзіцца для таго, каб даць магчымасць грамадскім арганізацыям і ініцыятывам з усёй краіны сустрэцца, паразмаўляць пра тое, што іх непакоіць, пра сваю дзейнасць, падзяліцца ноў-хаў, абмеркаваць найбольш актуальныя пытанні, якія паўстаюць у грамадскім жыцці Беларусі. І пры патрэбе - прыняць нейкія дзеянні, нейкія заклікі па далейшых планах”.

Сяржук Лісічонак удакладніў, што ў Асамблею НДА уваходзіць больш за 300 арганізацый, але ў імпрэзе меліся ўдзельнічаць не толькі яны: "Мы ладзім не проста Кангрэс Асамблеі НДА, але значна больш шырокае мерапрыемства. Выказалі жаданне прысутнічаць і іншыя арганізацыі", - удакладніў суразмоўца.