Ладуцька тлумачыць нізкія заробкі беларусаў санкцыямі ЕС

У зніжэнні заробкаў вінаватыя тыя, хто заклікае да ўвядзення эканамічных санкцый супраць Беларусі. Пра гэта1 траўня заявіў мэр Мінска Мікалай Ладуцька падчас афіцыйнага святочнага мітынга ў сталіцы.

Кіраўнік Мінгарвыканкама таксама зазначыў, што краіна пражыла “паспяховы год”.

“Мы з вамі пражылі няпросты, але паспяховы год. І сёння на свяце працы мы можам сказаць: мы зрабілі запланаванае. Мы выканалі тыя рубяжы, якія намячалі на першы квартал 2012 года. У гэтым годзе ў Мінску пабудуем мільён квадратных метраў жылля. Учора адбылося адкрыццё новай лініі па вытворчасці цэменту. Калі краіна будуе заводы па вытворчасці цэменту, яна развіваецца, яна накіраваная ў будучыню, яна жыве”, - цытуе яго БелаПАН.

Разам з тым афіцыйныя прафсаюзы на мітынгу патрабавалі годнай аплаты працы. Так, сярод усіх плакатаў і расцяжак часта сустракаўся лозунг пра "годны заробак". “Амаль кожны другі калектыў у розных формах выказваў жаданне атрымліваць "нармальны заробак за нармальную працу", - перадае “Еўрарадыё”.

Як раней паведамляла Служба інфармацыі “ЕўраБеларусі”, налічаны сярэдні заробак у Беларусі за сакавік склаў 3,16 млн рублёў (395 долараў), у Мінску - 4,1 млн рублёў (512,5 долара).