Асамблея НДА праводзіць сёмы Кангрэс

Асамблея няўрадавых дэмакратычных арганізыцый Беларусі 5-6 траўня ладзіць сёмы справаздатна-выбарчы Кангрэс. Пра гэта Службе інфармацыі “ЕўраБеларусі” паведаміў кіраўнік выканаўчага бюро Асамблеі НДА Сяржук Лісічонак.

“Мерапрыемства, якое будзе мець месца на гэтых выходных - гэта вялікі форум, на які прадстаўнікі грамадскіх арганізацый разнастайных інтарэсаў могуць прыехаць і прыняць удзел. Гэты кангрэс праводзіцца для таго, каб даць магчымасць грамадскім арганізацыям і ініцыятывам з усёй краіны сустрэцца, паразмаўляць пра тое, што іх непакоіць, пра сваю дзейнасць, падзяліцца ноў-хаў, абмеркаваць найбольш актуальныя пытанні, якія паўстаюць у грамадскім жыцці Беларусі. І пры патрэбе - прыняць нейкія дзеянні, нейкія заклікі па далейшых планах”, - зазначыў ён.

Сяржук Лісічонак дадаў, што ў Асамблею НДА ўваходзіць 302 арганізацыі, але ў Кангрэсе прымуць удзел не толькі яны.

“Мы ладзім не проста кангрэс Асамблеі НДА, але значна больш шырокае мерапрыемства. Там будуць прысутнічаць не адно члены Асаблеі, але і іншыя арганізацыі”, - удакладніў суразмоўца.

Кангрэс пройдзе ў Міжнародным адукацыйным цэнтры (IBB) у Мінску. Прадстаўнікі арганізацый-членаў Асамблеі будуць абіраць новае кіраўніцтва, а таксама абмяркуюць стан беларускай грамадзянскай супольнасці, развіццё рэгіянальных ініцыятыў, прасоўванне грамадскага дыялога і узаемадзеянне з палітычным сектарам.