У Мінску судзяцца за парк 40-годдзя Кастрычніка

Суд Фрунзенскага раёна Мінска пачаў разглядаць пазоў групы грамадзян да ўлад Мінска супраць знішчэння парка 40-годдзя Кастрычніка і будаўніцтва гатэля "Пекін".

Наступнае паседжанне адбудзецца 8 чэрвеня, паведамляе "Радыё Свабода".

Эколаг Валеры Дранчук, жыхар Мінска Уладзімір Зубок, а таксама прадстаўнік "Экадома" юрыст Сяргей Магонаў падалі пазоў супраць мінскага "Зелянбуда", адміністрацыі Ленінскага раёна Мінска і замежнага прадпрыемства, якое плануе пабудаваць гатэльны комплекс "Пекін".

Пазоў называецца "Аб спыненні гаспадарчай дзейнасці, якая аказвае шкоднае ўздзеянне на навакольнае асяроддзе".

Пазоўнікі патрабуюць спыніць знішчэнне парка.

Месца будоўлі гатэльнага комплексу "Пекін" - парк 40-годдзя Кастрычніка - было абрана інвестарам, камерцыйнай кампаніяй з Кітая. Пасля пратэстаў жыхароў навакольных дамоў улады паабяцалі скараціць высечку дрэў да мінімуму, але планаў пабудаваць гатэль не кінулі.