Напярэдадні Радаўніцы ў Курапатах паламалі крыжы

Ва ўрочышчы Курапаты невядомыя ўчынілі чарговы акт вандалізму. Напярэдадні праваслаўнай Радаўніцы там паламалі крыжы.

Гэта не першыя выпадкі вандалізму ва ўрочышчы Курапаты, дзе ў 1937-1941 гадах карнікі НКВД расстралялі, паводле розных падлікаў, ад 40 да 200 тысяч чалавек, нагадвае “Радыё Свабода”.

 Пры канцы 1990-х гадоў паламалі таблічку на Крыжы Пакуты.

 Што да мемарыяльнага знаку “Ад народу ЗША народу Беларусі дзеля памяці”, то было дванаццаць выпадкаў вандалізму. У 2002 годзе адрамантаваную каторы ўжо раз “лаву Клінтана” ўсталёўваў у Курапатах амбасадар ЗША ў Беларусі Майкл Козак.

У снежні 2005 году невядомыя вандалы двойчы апаганілі свастыкай і сатанінскімі надпісамі курапацкія крыжы, помнік загінулым ва ўрочышчы габрэям і выяву Курапацкай Божай Маці мастака Аляксея Марачкіна. Не раз ламалі і крыжы. З фактаў вандалізму ў Курапатах заводзілі крымінальныя справы, аднак злачынцаў ніколі не знаходзілі. Летась напярэдадні Дзядоў быў паламаны Крыж Пакуты, актывісты Кансэрватыўна-хрысьціянскай партыі БНФ аднавілі яго.

У 2008 годзе актывісты КХП БНФ затрымалі двух падлеткаў, якія павалілі некалькі крыжоў на алеі ў Курапатах. Актывісты выклікалі міліцыю і потым далі паказаньні супраць падлеткаў. Бараўлянская міліцыя распачала справу паводле артыкулу Крымінальнага кодэксу “Апаганьваньне гістарычна-культурных каштоўнасцяў”. Артыкул прадугледжвае пакараньне да трох гадоў пазбаўлення волі. 12 студзеня стала вядома, што міліцыя Бараўлянскага сельскага савету спыніла крымінальны пераслед двух маладзёнаў, якіх падазравалі ў разбурэнні крыжоў. Доказаў, якія атрыманыя ў часе сьледзтва, недастаткова, для таго, каб перадаць справу ў суд і прыцягнуць да адказнасці двух непаўнагадовых навучэнцаў школы і ПТВ.

 Грамадскасць звярнулася да ўладаў з заклікам забяспечыць ахову ўрочышча Курапаты, якое з’яўляецца гістарычна-культурнай каштоўнасцю першай катэгорыі. Аднак у адказ упраўленне ўнутраных справаў Мінскай вобласці прапанавала аргкамітэту для ўшанавання памяці ахвяраў сталінскіх рэпрэсіяў плаціць за ахову ўрочышча Курапаты.