Канадскаму прафэсару адмовілі ў беларускай візе

Личности

Вядомаму канадскаму палітолагу і даследчыку Беларусі Дэйвіду Марплзу беларускія ўлады адмовіліся выдаць уезную візу. Пра гэта прафэсар паведаміў на сваёй старонцы ў Facebook.

“Маё хадайніцтва аб беларускай візе адхілілі. З мной такое здарылася ўпершыню, і праз гэта цяпер будзе вельмі складана здабываць візу яшчэ раз”, - зазначыў Дэйвід Марплз.

Дэйвід Марплз - канадзкі гісторык і палітоляг, прафэсар на гістарычным факультэце Унівэрсітэта Альбэрты ў Эдмантане. Кіруе адной з праграмаў вывучэння сучаснай Украіны ў Канадзкім інстытуце ўкраіністычных даследаванняў. Аўтар 12 кніжак і больш за 150 артыкулаў па гістарычных і палітычных пытаннях Расіі, Украіны і Беларусі. Летась быў абраны старшынём Паўночнаамерыканскай асацыяцыі беларусазнаўчых даследаваньняў. З’яўляецца дарадцам па пытаннях Усходняй Еўропы Дзяржаўнага дэпартамэнта ЗША, Дэпартаменту замежных справаў і міжнароднага гандлю Канады ды Міністэрства замежных справаў Вялікабрытаніі.

Апублікаваў тры кніжкі пра Беларусь: Belarus: From Soviet Rule to Nuclear Catastrophe (“Беларусь: Ад савецкай улады да ядзернай катастрофы”) у 1996-м, Belarus: A Denationalized Nation (“Беларусь: дэнацыяналізаваная нацыя”) у 1999-м і The Lukashenka Phenomenon: Elections, Propaganda, and the Foundations of Political Authority in Belarus (“Феномен Лукашэнкі: выбары, прапаганда і асновы палітычнай улады ў Беларусі”) у 2007-м.